Бүгүн, от ыйын 19 күнүгэр, Алдан уонна Нерюнгри оройуоннарыгар 11 мм уонна онтон элбэх сөҥүүлээх дохсун ардах түһүөҕүн, ол сөкүүндэҕэ 15-17 миэтэрэ түргэн тыаллаах этиҥинэн доҕуһуолланыан туһунан Гидрометеорология Саха сиринээҕи киинэ сэрэтэр. Өрөспүүбүлүкэ баһыйар өттүгэр былыттаах халлаан бүрүүкүүр.
Ол курдук, түүнүн Үөһээ Дьааҥы, Эбээн Бытантай, Усуйаана (соҕуруу өттүгэр), Томпо, Өймөкөөн, Уус Маайа, Амма, Таатта, Чурапчы, Уус Алдан улуустарыгар көтө сылдьан түһэн баран, уоскуйуоҕа. Кэбээйигэ, Эдьигээҥҥэ түүн түспүт былыт хоту диэки сыҕарыйыа. Күнүс Өлөөҥҥө, Анаабырга, Булуҥҥа, Усуйаанаҕа (хоту өттүгэр), Аллайыахаҕа, Аллараа Халымаҕа, Абыйга, Муомаҕа, Орто Халымаҕа, Үөһээ Халымаҕа ардыаҕа.
Мииринэй оройуонугар эмиэ, чуолаан, хоту өттүгэр быстахтык түһүө. Бу эҥээри былыт буулаабыта ыраатта. Ол эрээри, синоптиктар бүгүн Сунтаар, Ньурба, Үөһээ Бүлүү уонна Бүлүү улуустарыгар самыырдаабатын мэктиэлииллэр. Ленскэйгэ, Өлүөхүмэҕэ уонна Дьокуускай эҥээригэр эмиэ сөҥүүтэ суох.
От ыйын 20-21 күннэригэр өрөспүүбүлүкэ киин, илин эҥээрдээҕи уонна соҕуруу улуустарыгар быстахтык ардыаҕа. Сорох сиргэ этиҥнэнэн-чаҕылҕаннанан, тыалыран-кууһуран, дохсуннук түһүөҕэ. Хотулуу-арҕаа, Өлүөнэ аллараа сүүрүгэр, Үөһээ Дьааҥыга сөҥүүлээх. Синоптиктар билгэлииллэринэн, сарсын-өйүүн хотулуу-илин хайалаах сирдэргэ түүнүн салгын температурата 0, +5 кыраадыска диэри сөрүүдүйүө. Күнүс арҕаа 22-27, соҕуруулуу-илин уонна илин эҥээргэ 27-32 кыраадыска тиийэ итийиэ.
Тыа хаһаайыстыбатын министиэристибэтин гражданскай оборона уонна ыксаллаах быһыы-майгы боппуруостарыгар тутаах исписэлииһэ Михаил Окороков этэринэн, тыа сирин дьоно сайын от үлэтин кэмигэр кылгаабыта нэдиэлэтээҕи билгэлээһиҥҥэ наадыйаллар эрээри, гидрометеорологтар үс хонук иһинэн сабаҕалааһын чуолкай соҕус буолуоҕун мэктиэлииллэр. Онтон анараа өттүгэр туох буолуоҕун таҥара эрэ билэн турдаҕа…
Василий Никифоров. Сардана Васильева хаартыскаҕа түһэриитэ
Также по теме:
Ливни и грозы обрушатся на Южную Якутию
В Якутии обильные дожди не связаны с работой зондировщика — Дмитрий Лепчиков
Читайте нас в:
