Ольга Новгородова Нам улууһун Хамаҕатта саха-французскай лицейигэр учууталынан үлэлээбитэ 28 сыл буолла. Кини француз тылыгар хас да көлүөнэ оҕону үтүө суобастаахтык уһуйда. Ольга Дмитриевна биир идэлээхтэрин кытта лицей үөрэнээччилэрин Франциянан, Бельгиянан илдьэ сылдьан, дойду культуратын кытта ыкса билиһиннэрэр, тылга-өскө өссө күүстээх интэриэһи үөскэтэр үтүө үгэстээхтэр. Республикаҕа Үлэ уонна дойдуга Учуутал, аҕа сүбэһит сылыгар анаан саха-французскай лицей араас сылларга бүтэрбит выпускниктарын уонна билигин үөрэнэ сылдьар оҕолор тапталлаах учууталларын Ольга Новгородова туһунан биэриини көрүҥ.
Ольга Дмитриевна Иркутскайдааҕы Хо Ши Мин аатынан омук тылын институтун бүтэрбитэ. Француз тылын учуутала уонна уһуйаан иитээччитэ диэн икки идэни баһылаабыта. Ол кэннэ тута төрөөбүт Намын улууһугар Хамаҕаттаҕа лицей төрүттэнэрин истэн үлэлии кэлбитэ. Ол күнтэн ыла үс кылааһы салайан, кынаттаан таһаарда. Уонунан сыл тухары соҕурууҥҥу учууталлары, омук тылынан саҥарааччылары кытта бииргэ үлэлээн, кэккэ бырайыактары иилээн-саҕалаан, үлэ үөһүгэр сылдьар.
Ulus.Media
Читайте нас в:
