Бу күннэргэ Красноярскай кыраайга Дьэһиэй нэһилиэгин 395 сылын көрсөр тэрээһиҥҥэ Саха сириттэн делегация баран эҕэрдэлээтэ. Хомус быыстапкатын Варвара Степанова-Арчыына илдьэн көрдөрдө уонна хомус тыаһын иһитиннэрдэ.
От ыйын 8 күнүгэр Дьэһиэй нэһилиэгин үбүлүөйдээх тэрээһинигэр Аан дойдутааҕы хомус кииниттэн уонна түмэлиттэн 13 хомус арааһын илдьэн көрдөрдүлэр. Саха сирин бастыҥ уустара уран тарбахтарынан чочуйан оҥорбут хомустара быыстапкаҕа турдулар.
Быыстапканы сырдатта уонна хомус тыаһын иһитиннэрдэ СР үтүөлээх артыыһа, аан дойду виртуоз хомусчута, аан дойду култууратын маастара Варвара Степанова-Арчыына:
«Саха омуга хомуһу өрө тутан күн бүгүҥҥэ диэри илдьэ сылдьарбытын, уһуйааннарга, орто оскуолаларга эбии үөрэхтээһин быһыытынан дьарыктыырбытын, оҕо искусствотын оскуолатыгар, М.Н. Жирков аатынан Дьокуускайдааҕы музыкальнай колледжка туспа дисциплина быһыытынан үөрэтиини, А.Д.Макарова аатынан Культура уонна искусство колледжыгар, Арктикатааҕы култуура уонна искусство институтугар, М.К.Аммосов аатынан Хотугулуу Илиҥҥи федеральнай университекка хомуска оонньооһун үрдүк таһымнаахтык үөрэтиллэрин туһунан кэпсээтибит», — диэтэ кини.
«Эвенкия оройуонун баһылыга Андрей Черкасов хомуһу үөрэтии уонна үгүс киһи хомуска оонньуурун туһунан истэн олус сэргээтэ. Дьэһиэйгэ хомуска оонньуурга Анатолий Еспек үөрэтэр эбит. Анатолий 1997 сыллаахха Дьокуускайдааҕы культпросветы бүтэрбит. Хомуска Римма Романовна Жирковаҕа үөрэммитин туһунан киэн тутта кэпсиир», — диэн виртуоз хомусчут Варвара Степанова-Арчыына үллэстэр.
Дьэһиэй сахалара Арчыына толоруутугар ырыалаах сыыйа тардыыны олус истиҥник ылыннылар. Ону таһынан, саҥа киирбит ньымалары истэн, хомус тыаһын нөҥүө Саха сирин маанылаах айылҕатын тыаһын, көтөр-сүүрэр саҥатын тэҥинэн истэн кэрэхсээтилэр.
Дьэһиэй сахалара Болугур, Маймаҕа, Чорду, Өспөх, Осогостох, Бетти диэн аҕа уустара 700-тэн тахса буолан түөлбэлээн, сахалыы саҥаран, балыктаан, кыыл табаны бултаан олороллор.
Инникитин Саха сирин кытта ыкса үлэлэһэн, хомус тыаһа Дьэһиэйгэ үгүстүк дьүрүһүйэригэр баҕалаахтар.
Ааптар хаартыскаҕа түһэриитэ
Өссө сэргээн ааҕыҥ:
Дьэһиэй сахалара төрөөбүт тылларын харыстыыр соруктаахтар
Читайте нас в:
