Амма улууһун дьаһалтатын сакааһынан улуустааҕы эдэр натуралистар станцияларын үлэһиттэрэ, сайыҥҥы лааҕыр оҕолоро адаптивнай спорт көрүҥнэригэр “Дьулуур” спартакиада кытааччыларыгар сэдэх бэлэхтэри хомуйдулар. Алгыстанар кэмпилиэги таһынан манна бэс эриэхэтиттэн кэмпиэт, моонньоҕонноох кучу чэй киирэр.
Киһи сэргиир, бэртээхэй кэмпилиэктэри үлэһиттэр лааҕыр оҕолорун кытары икки нэдиэлэттэн ордук бэлэмнээтилэр.
— Кучу чэйбитин анал тэрилэ суох барытын илиинэн оҥорор буоламмыт үлэлээх соҕус буолла. Сэбирдэхтэри хомуйан уутун илиинэн ыгабыт, духуопкаҕа куурдабыт. Хата, өрөбүлэ суох тура тэбинэн туран оҥороммут кэмигэр, болдьоҕун баттаһа 1300 устууканы бэлэм гынныбыт. Чэйи таһынан бу хомулукка боҕоруоскай оттоох, туостаах, үрүҥ сылгы сиэллээх алгыстанар, арчыланар кэмпилиэк киирдэ. Өссө бэс туорааҕыттан сакалаатынан бүрүллүбүт кэмпиэт оҥорон уктубут. Туорааҕы пыльцата түһүөн иннинэ хомуллар. Маннык кэмпиэт хааннарын баттааһыннара үрдүк дьоҥҥо туһалаах, — диэн натуралистар станцияларын дириэктэрэ Дмитрий Матвеев сырдатар.
Хомулуктары улуус дьаһалатата “Дьулуур” адаптивнай спорт көрүҥнэригэр Спартакиада бары кыттыылаахтарыгар бэлэх быһыытынан туттарыа.
Елена Александрова, «Амма олоҕо»
Читайте нас в:
