Бэс ыйын 17-18 күннэригэр Верхоянскай куорат 385 сыллаах үбүлүөйдээх Үрүҥ Тунах Ыһыаҕа буолан ааста. Былыр-былыргыттан ханнык баҕар ыһыахха ат сүүрдүүтэ – эдэрдиин-эмэнниин кэрэхсиир, сэргиир күрэхпит. Бу да сырыыга Дьааҥы улууһун салалтата эрдэттэн тэринэн, ботуччу бириистэри туруорда.

Ол курдук, сүүрдүүгэ барыта 48 сүүрүүк атынан 8 хамаанда күөн көрүстэ. Табалаахтар уонна элгэстэр иккилии хамаанда, маны таһынан Арыылаах, Адыаччы уонна Бабушкинскай нэһилиэк хамаандаларын туруордулар. Улахан Ыһыахха Эбээн Бытантай улууһуттан ат сүүрдээччилэрэ өтөрүнэн буолбатах көстүүнү бэлэхтээн, кыайан-хотон, ситиһии өрөгөйдөннүлэр. Бар дьон сөҕөн-махтайан, уостан түспэт үтүө сонун буолла. Уолаттар мантан үс – Герасим Стручков, Уйгулан Никитин, Дмитрий Бочкарев буолан, «Хос Алаас» аатыттан тэринэн атынан барбыттар. Дьааҥы нэһилиэктэрэ аттарын массыынанан тиэйбит эбит буоллахтарына, биһиэттэрэ Дугуйдаан убайдарын кэриэтэ, сахалыы-махалыы атынан тиийбиттэрэ үгүс киһини сөхтөрдө.

«Саккырыырдар жокей уоллара ат үрдүгэр төрөөбүт быһыылаах. Маннык хас да сүүрдүүгэ инники күөҥҥэ тахсыбыт, биһиги диэки букатын буола илик, астык сүүрдүүнү көрдөрдүлэр, итиччэ ыраахтан аттара эстэн кэлбитэ буолуоҕа диэбиппит. Бастаан көрөн баран, кып кыра, улахан баҕайы истээх аттар хайдах сүүрэллэрэ буоллар диэн өссө аһына санаабыппыт, кэһэттилэр…», — диэн дьааҥылар дьиэ аайы сөҕө – махтайа ырыталлар, кэпсээн төрдө оҥостоллор.

Бастакы күн Герасим Стручков жокейдаах аттар 5 араас дистанцияҕа бириистээх миэстэлэри ситиспитэ көрбүтү эрэ сөхтөрдө, истибити эрэ соһутта.

Бастакы күн түмүгэ:

— 800 м. – 2 миэстэ;
— 1200 м. – 1 миэстэ;
— 1600 м. – 1 миэстэ;
— 2400 м. – 1 миэстэ;
— 4800 м. – 1 миэстэ.

Иккис быһаарыылаах күҥҥэ, 4800 м. «Звезда» атынан Герасим Стручков ыраас кыайыыны ситиһэн чөмпүйүөн үрдүк аатын ылла. 2400 м. «Комбриг» — 2 миэстэни, 1600 м. «Уолчаан» — чөмпүйүөннээтэ. Ол курдук, Саккырыыр хамаандата муҥутуур кыайыылаах тахсан 500 000 солк. сүрүн бирииһи тутта. 2 миэстэ – Табалаах 1, үһүс миэстэҕэ Арыылаах хамаандата таҕыстылар.

Дьэ, сити курдук, чахчы чаҕылхайдык кыайбыт-хоппут, улуустарын, нэһилиэктэрин ааттатыаҕын ааттаппыт ыччаттарбытыгар – Герасим Стручковка, Дмитрий Бочкаревка, Уйгулаан Никитиҥҥа итии-истиҥ эҕэрдэ! Сыспай сиэллээҕи иитиигэ уһуйбут аҕа сүбэһиттэригэр Дмитрий Дмитриевич Бочкаревка өр сыллаах үлэҥ үтүө түмүктээх буолбутунан биир дойдулаахтарыҥ ааттарыттан истиҥ эҕэрдэ!

Яна Рожина. Хаартыска: Павел Никифоров

Салгыы сэргээн ааҕыҥ:

Ыраах Түгэһииргэ саха сүөһүтүгэр мэҥэ өйдөбүнньүк турда