Халаан уута ыам ыйын 30 күнүгэр Сааскылаах нэһилиэгэр 37 киһи олорор 6 дьиэтин уонна 11 тиэргэни, “Аэропорты Севера” федеральнай тэрилтэ Анаабырдааҕы филиалын үлэлиир аэровокзалын, авиапорт көтөр-түһэр балаһатын барытын ылбыта. Улуус баһылыга Эдуард Платонов, баһылыгы бастакы солбуйааччы Василий Поскачин тус хонтуруолларыгар балаһыанньаны туталлар. Онон, бу халаан уута ылбыт биричиинэтинэн Сааскылаах-Дьокуускай салгын айанынан түөрт рейсовай самолетунан көтүүгэ айанньыттар хаайтардылар.

Улуус баһылыга Эдуард Платонов «Аэропорты Севера» ФКТ генеральнай дириэктэринээн Вадим Волковтыын баар кыһалҕаны быһааран кэпсэтии ыыталлар. Билиҥҥи туругунан халаан уутун таһыма намтаабытынан, үлэлиир тэрилтэни, самолет түһэр балаһатын чөлүгэр түһэрэр үлэлэр бараллар.

Онон, Анаабырдааҕы Сааскылаах авиапордун балаһата, быһа холоон бэс ыйын 8 күнүгэр аһыллыаҕын, «Сааскылаах-Дьокуускай» рейстэрин бэрээдэктэммит сырыылара олохтонуон сөбүн генеральнай дириэктэр Вадим Волков иһитиннэрдэ. Билиҥҥи кэмҥэ тыын суолталаах боппуруос быһаарылларыгар порт үлэһиттэрэ күннэтэ түбүгүрэллэр.

Улуустааҕы ЕДДС начальнига, ГО уонна ЫБМ специалиһэ Александр Алексеев иһитиннэрбитинэн, бүгүҥҥү туругунан уу критическэй таһыма 1170 см буоллаҕына, билигин намтаан уу таһыма — 1082 бэлиэтэнэр.

Гуннара Байгильдина