Үгүс киһи «Ералаш» диэни иһиттэҕинэ оҕо сааһын кэрчик кэмигэр эргийэн, киин тэлэбиидэнньэҕэ көстүбүт оҕо телесурунаалын тэттик киинэлэрин санаан мичик аллайар буолуохтаах. Оҕо эрэ буолуо дуо, сааһыттан тутулуга суох бары даҕаны бу көрдөөх, дьээбэлээх уус-уран биэриини, бука, сөбүлээн көрөрбүт буолуо. Сөҕүөхпүт уонна киэн туттуохпут иһин, бу киин тэлэбиидэнньэҕэ көстөр, чахчы артыыс талааннаах эрэ оҕолор сүүмэрдэнэн уһуллар киинэсурунаалларыгар — «Ералашка» — Сунтаардааҕы политехническай лиссиэй-интэринээт сэттис кылааһын үөрэнээччитэ Давид Зорин номнуо үсүһүн уһулунна. Бүгүн биһиги Давиды көрсөн кэпсэтэбит.

— Давид, «Ералашка» уһуллууҥ туһунан кылгастык кэпсээ эрэ. Бастаан хайдах саҕаламмытай?

— Сочи куоракка Бүтүн Арассыыйатааҕы чинчийэр куоҥкуруска кытта сырыттахпына «Ералаш» киинэ устар хамаандатын дьоно таба көрөн кастиҥҥа ыҥырбыттара. Сүүмэрдээһиҥҥэ тиийэн араас ыйытыыга хоруйдаабытым, хоһоон уонна монолог аахпытым. Бу кастинг кэнниттэн хас да хонон баран төлөпүөннээн сүүмэрдээһини ааспыппын, салгыы Москваҕа актер маастарыстыбатын оскуолатыгар үөрэниэхтээхпин эппиттэрэ. Хамсык кэмэ буолан, дистанционнайдык үөрэммиппит. Алта ый устата биллэр артыыстар: Аронова, Запашнайдар, Камынина, Карпович, о.д.а., ону таһынан Грачевскай бэйэтэ, үөрэппиттэрэ.

Үөрэхпит бүтүүтэ эксээмэн туттарбыппыт. Эксээмэни ордук үчүгэйдик туттарбыттарга сүрүн оруоллары биэрбиттэрэ. Миэхэ эмиэ сүрүн оруолу толорор чиэс тиксибитэ. Маны таһынан актер маастарыстыбатын оскуолатын бүтэрбиппит туһунан диплому туппуппут. Дьэ ол кэннэ бастакы роликпар уһуллубутум. Роликпыт премьерата Москваҕа баар «Центральный дом кино» буолбута, онно кыһыл көбүөр дорожкатыгар ыҥырыллыбыппыт, бука барыбытын премьеранан эҕэрдэлээбиттэрэ.

— Уопсайа «Ералаш» 3 сиэрийэтигэр сүрүн оруолу толорбуккун. Төһө долгуйдуҥ? Төһө сөбүлээтиҥ?

— Олус долгутуулаах, ол быыһыгар сүрдээх интэриэһинэй этэ. Уһуллуох иннинэ элбэхтик эрчиллибит буолан, уһуллуу былаһааккатыгар долгуйбатаҕым диэххэ сөп. Төттөрүтүн, артыыс үлэтин сөбүлүүр буоламмын, миэхэ олус табыгастаах эйгэ этэ. Киинэҕэ уһулларбын наһаа сөбүлээбитим.

— Устуудьуйаҕа уһуллар кэмҥэр элбэх саҥа доҕоттордонноҕуҥ. Кэлин алтыһаҕыт дуо?

— Уһуллуу кэмигэр араас элбэх оҕону кытта билсиспитим. Олортон сорохторун кытта билигин да алтыһабыт, суруйсабыт.

— Салгыы артыыс быһыытынан, ити хайысхаҕа сайдар былааннааххын дуу?

— Артыыс быһыытынан уһуллары олус сөбүлүүбүн, онон инникитин киинэҕэ уһуллубут киһи диэн баҕа санаалаахпын. «Ералашка» уһуллубут буолан, билигин картотекам «Мосфильмҥа» баар.

— Үөрэх дьыла түмүктэнэн сайыҥҥы сынньалаҥ саҕаланна. Сайыҥҥы каникулгар туох былааннааххын?

— Үөрэхпин туйгуннук түмүктээтим. Өрөспүүбүлүкэтээҕи «Инникигэ хардыы» НПК-ҕа уонна Арассыыйа таһымнаах «Наукаҕа бастакы хардыылар» диэн эдэр чинчийээччилэр куоҥкурустарыгар кыайбыппар Иссык Куль куоракка баар норуоттар икки ардыларынааҕы чинчийэр оскуолаҕа үөрэххэ ыҥырбыттара. Онно барыахтаахпын. Үөрэхпит английскай тылынан буолуохтаах.

— Улааттаххына туох идэлээх киһи буолуоххун баҕараҕын?

— Улааттахпына дипломат эбэтэр учуонай буолуохпун баҕарабын. Эбэтэр артыыс. Бу үс хайысханы үһүөннэрин ордорон тэҥник сөбүлүүбүн. Ону таһынан бэлиитикэни, киинэни, араас чопчу науканы (ордук биологияны уонна физиканы) сэргиибин. Английскай тылы анаан эбии үөрэтэбин.

— Давид, олус интэриэһинэй кэпсээниҥ иһин махтанабын, ыра санааларыҥ туолалларыгар баҕарабын.

Олус ис киирбэх, кэпсэтинньэҥ, элэккэй, күн курдук күлэ сылдьар талааннаах оҕобутугар Давид Зориҥҥа ситиһиилэри баҕарыаҕыҥ.

«Сунтаар сонуннара»