Ил Дархан Айсиэн Николаев бэҕэһээ, ыам ыйын 31 күнүгэр, Эбээн Бытантай национальнай улууһунааҕы тургутар лабораториялаах бэтэринээрийэ управлениетыгар Д.А. Бочкарев аатын иҥэрэр туһунан Ыйаахха илии баттаата. СӨ Бэтэринээрийэҕэ департаменын салайааччыта Петр Петров этэринэн, Саха сирин бэтэринээрийэтин устуоруйатыгар тэрилтэҕэ киһи аата аан маҥнай иҥэрилиннэ.

“Эбээн Бытантай национальнай улууһа” муниципальнай оройуон дьаһалтата Бэтэринээрийэ департаменыгар киллэрбит хадаатайыстыбатыгар:

“Саха Өрөспүүбүлүкэтигэр Үлэ сыла биллэриллибитинэн, улууспут бастакы бэтэринээринэй биэлсэрин уонна улуустааҕы учаастак маҥнайгы сэбиэдиссэйин, үлэ уонна тыыл бэтэрээнин Дмитрий Алексеевич Бочкарев сырдык аатын Эбээн Бытантай улууһунааҕы тургутар лабораториялаах бэтэринээрийэ управлениетыгар иҥэрэргитигэр көрдөһөбүт”, – диэн суруллубут.

Д.А. Бочкарев 1914 с. алтынньы 9 күнүгэр Уус Алдан Саһылыкааныгар төрөөбүтэ. Кини 1936 с. Дьокуускайдааҕы тыа хаһаайыстыбатын техникумун үөрэнэн бүтэрэн (бастакылартан биирдэстэрэ), Саккырыыр оройуонугар саҥа арыллыбыт бэтэринээрийэ учаастагар сэбиэдиссэйинэн ананан тиийбитэ. Дмитрий Алексеевич 1954 с. Ленинградтааҕы тыа хаһаайыстыбатын институтун иһинэн табаны иитии исписэлиистэрин идэлэрин үрдэтэр 4 ыйдаах куурустарыгар үөрэммитэ.

Эдэр исписэлиис ыраах хоту кэлэн, киэҥ сирдээх-уоттаах, суола-ииһэ суох, табаны, сылгыны уонна ынах сүөһүнү иитиинэн дьарыктанар оройуоҥҥа кытаанах тургутууну, этэргэ дылы, олохоскуолатын ааспыта. Үлэҕэ дьүккүөрдээх эдэр киһи ыарахаттартан чаҕыйбакка, хоту дойду дьонун ытыктабылын ылыан ылбыта. Сэрии ыар сылларыгар Тыа хаһаайыстыбатын министиэристибэтин дьаһалынан Саккырыыр оройуонун 5 холкуоһуттан 300 чулуу сылгыны талан, 2 тыһ. км кэриҥэ сири айаннаан, Дьокуускайга тириэрдиигэ Дмитрий Бочкарев быһаччы кыттыбыта уонна салайбыта. Ол сылгылар салгыы Украина фронугар ананан барбыттара. Ити сылларга табалары эмиэ сүүмэрдээн, Дьокуускайга соҕотуопка хонтуоратыгар үүрэн илдьэллэрэ.

Д.А. Бочкарев 1992 с. олохтон туоруор диэри бэтэринээрийэ сулууспатыгар үлэлии сылдьыбыта. Кини үлэҕэ, идэҕэ баай үөрүйэҕинэн улуус элбэх көлүөнэ бэтэринээрдэригэр дьиҥнээх настаабынньык, аҕа табаарыс этэ. Дмитрий Алексеевич бэриниилээх үлэтэ “Үлэҕэ килбиэнин иһин” мэтээлинэн, ССРС бырабыыталыстыбатын уонна Саха АССР Үрдүкү Сэбиэтин Президиумун Бочуоттаах суруктарынан бэлиэтэммитэ, 1982 с. Верхоянскай оройуон “Бочуотун кинигэтигэр” киллэриллибитэ, Үөһээ Дьааҥы уонна Эбээн Бытантай улуустарын Ытык киһитэ.

Д. Бочкарев оҕолоро кыраларыгар огдообо хаалан, бэйэтэ иитэн атахтарыгар туруорбута, аҕыс оҕотун ахсыаннарын үөрэттэрэн, үлэһит дьон оҥортообута. Барыларыгар үлэҕэ тапталы иҥэрбитэ халтайга хаалбата: туйах хатарааччылардаах, Бочкаревтар төрөөбүт дойдуларын сайдыытыгар кылааттара улахан. Дмитрий Алексеевич оҕолорун ортотугар өрөспүүбүлүкэ норуотун хаһаайыстыбатын, тыатын хаһаайыстыбатын уонна үөрэҕин  үтүөлээх үлэһиттэрэ, муниципальнай сулууспа туйгуна, “Гражданскай килбиэн” бэлиэнэн наҕараадаламмыттар бааллар.

Бэтэринээрийэ департаменын салайааччыта Петр Петров:

“Улуустан хадаатайыстыба түһэрбиттэригэр тута уопсай мунньахпытыгар көрөн ылыммыппыт. Ол иннинэ бырабыыталыстыба бэрэссэдээтэлэ Андрей Тарасенко Эбээн Бытантайга отчуокка тиийэ сырыттаҕына туруорсубуттар этэ. Мин бырабыыталыстыба бэрэссэдээтэлин солбуйааччы Ольга Балабкина салайааччылаах хамыыһыйаҕа көмүскээбитим. Ааты үйэтитиигэ 5 хандьыдааттан бэтэринээр идэлээх киһи бигэргэммитэ биһиги сулууспабытын суолталааһын дии саныыбын. Уопсайынан, биһиги салайааччыларбыт үлэһит дьон үтүөтүн сыаналыылларыгар махтаныах эрэ кэриҥнээхпит”, – диэтэ.

Василий Никифоров