Кэлиҥҥи сылларга сааһын наар уһуннук хатыыр, тымныйар буолла. Быйыл даҕаны халлаан ол “эрэсиимиттэн” туораабата. Хойутаан сылыйан, онно эбии сорох сиргэ хаардаан, бурдук үүннэрэр хаһаайыстыбалар бааһыналарыгар нуорматтан нэдиэлэ, уонча хонук тардыллан киирдилэр.

Быйыл саас тыа хаһаайыстыбатын култууратын 48,7 тыһ. гектарга ыһар сорук турар. Ону таһынан 7,1 тыһ. (былырыын 5,5 тыһ. этэ) гектар иэннээх бааһына паарданыахтаах. Ыһыы бүттүүн иэниттэн 10,8 тыһ. (былырыын 10,7 тыһ. этэ) гектарын туораахтаах култуура, 29,7 тыһ. (31,1 тыһ. этэ) сүөһү аһылыгар аналлаах култуура, 6,7 тыһ. (6,0 тыһ. этэ) гектарын хортуоппуй, 1,3 тыһ. (былырыыҥҥы саҕа) гектарын аһаҕастык үүннэриллэр оҕуруот аһа ылаллар.

Тыа хаһаайыстыбатын министиэристибэтигэр, сүрүннээн, ыам ыйын 29 күнүгэр түмүллүбүт уонна бүгүн ситэриллибит дааннайдартан сирдэттэххэ, 3 524 гектарга туораахтаах култуура ыһыллыбыт.

Амма улууһугар ыһыы үлэтэ

Ыһыы үлэтин бастакынан саҕалаабыт Мэҥэ Хаҥалас улууһугар 1 155 гектарга, ол иһиттэн “Тумул” ТХПК 458, урбаанньыт-бааһынай А.Н. Попов 337, урбаанньыт-бааһынай А.А. Борисов 300 гектардыы ыһыылаахтар. Хаҥалас улууһугар 912 гектарга ыстылар: “Хачыкаат” ТХПК 255 гектарга эбиэс, 132 гектарга нэчимиэн, 219 гектарга сэлиэһинэй, урбаанньыт-бааһынай Е.С. Денисова 208 гектарга эбиэс, 91 гектарга нэчимиэн уонна “Наука” ХЭУо 6 гектарга нэчимиэн сиэмэлэрин түһэрдилэр.

Амма улууһугар ыһыы үлэтэ

Уус Алдаҥҥа 636 гектар иэннээх ыһыыланнылар. Мантан 269 гектарга эбиэһи уонна 90 гектарга сэлиэһинэйи урбаанньыт-бааһынай Д.В. Илларионов, 161 гектарга эбиэһи уонна 115 гектарга сэлиэһинэйи “Биэттэ-Агро” ХЭУо ыстылар. Дьокуускай фермерэ Е.В. Котрус 100-түү гектарга эбиэс, нэчимиэн, сэлиэһинэй ыһыыланна.

Атыттартан хойутаан саҕалаабыт Амма улууһугар “Абаҕа” ХЭУо 117 гектарга нэчимиэн, 101 гектарга эбиэс, “Бөтүҥ” ТХПК 160 гектарга эбиэс, Өлүөхүмэ улууһугар “Поиск” ТХПК 95 гектарга сэлиэһинэй, “Өлүөхүмэ кыладабыайа” ХЭУо 209 гектарга ыһыыланнылар.

Өлүөхүмэ улууһугар ыһыы үлэтэ

Сүөһү аһылыгар аналлаах култуура сиэмэтэ 11 075 гектарга хара сири булла, ол эбэтэр былааннаммыт кээмэйтэн 37 бырыһыана, былырыыҥҥы туһааннаах кэмҥэ ыһыллыбыттан 91 бырыһыана. Ити иһигэр 332 гектара биир сыллаах, онтон уратыта элбэх сыллаах оттор.

Хаһаайыстыбалар хортуоппуйу олордууга бу ый бүтүүтүгэр, бэс ыйын саҥатыгар күргүөмүнэн турунуохтара. Билиҥҥитэ 1 281 гектардаах бааһынаҕа сиэмэ хортуоппуйу буорга булкуйдулар, ол былаан 19 бырыһыаныгар тэҥнэһэр. Тэтим былырыыҥҥыттан 2 бырыһыанынан ордук. Аһаҕастык үүннэриллэр оҕуруот аһын 229 гектарга ыстылар.

Хаҥалас улууһугар ыһыы үлэтэ

Министиэристибэ сиртэн үүнүүнү ылыыга уонна матырыйаалынай-тэхиньиичэскэй хааччыйыыга департаменын салайааччыта Вячеслав Гаврильев ыһыы үлэтэ күнтэн-дьылтан тутуллан, төһө даҕаны хойутаабытын иһин, мантан ыла халлаан туран эрэ биэрдэр, кэмигэр түмүктэнэригэр уонна былырыыҥҥы тэтими куоһарарыгар эрэллээх.

Василий Никифоров. «Амма олоҕо», «Хаҥалас», «Олекма» хаһыаттар хаартыскалара