Өрөбүл күн киэһэ аҕыс чаас ааһыыта кырачаан Лия дьиэтин таһыгар оонньуу сылдьан, Анаабыр өрүс салаатыгар алҕаска ууга түһэн, сүүрүгүнэн уста турбут. Маны хата дьолго, хорсун оҕолор көрө охсон, бу муустаах уу тымныытыттан куттаммакка, харса суохтук сүүрүктээх ууга ыстанан, быыһаан таһаарбыттар. Улахан махталын кыысчаан ийэтэ Галина Андросова тиэртэ, дьоруой оҕолору Арассыыйа тустаах тэрилтэтин наҕараадатыгар түһэриэххэ, бэлиэтиэххэ наада диэн «Анаабыр уоттара» хаһыакка санаатын эттэ:

— Кыыспын Лияны бу хоту дойдубут тымныы сүүрүктээх уутуттан ороон таһааран, өссө бэйэлэрин кууркаларын устан кыра оҕолуу суулаан аҕалбыттара. Дьэ бу дьоруой оҕолор: Сахамин Андросов, Лаврентий Назаров, Азалия Абдирашитова. Сааскылаах орто оскуолатын алтыс кылааһын үөрэнээччилэрэ. Кинилэргэ уонна төрөппүттэригэр бэйэм уонна оҕолорум ааттарыттан ийэлии истиҥ махталбын тиэрдэбин, үөрэххитигэр ситиһиилээх, дьоллоох буолуҥ! Киһи арааһы санаатаҕына айманыах да курдук, оҕолоргутун бары көрө-истэ сылдьаргытыгар этиэм этэ. Билигин кыыһым киин балыыһаҕа киирэн, доруобуйатын туругун чинчийэн көрдөрө сытабыт.  

Хорсун оҕолорунан Сахаминынан, Лаврентийынан, Азалиянан киэн туттабыт, улахан киһилии күүстээх санааларын, түргэн туттунуулаах быһаарыныылаахтарын иһин. Бүгүн дьоруойдарбыт балыыһаҕа быыһаабыт кыыстарын ийэтинээн көрсө кэллилэр, туругун ыйыттылар, хаартыскаҕа түстүлэр, Лия этэҥҥэтиттэн үөрэн сирэйдиин сырдаатылар.

Бары улууспут төрөппүттэригэр, бу сааскы халаан уутун кэмигэр оҕолоргут ханна сылдьалларын кытаанах хонтуруолга ыларгытыгар, киэһэ 22.00 чаас кэнниттэн оскуола оҕолоро улахан киһи арыаллааһына суох уулуссаҕа сылдьыа, күүлэйдиэ суохтаахтарын өссө төгүл санатабыт.

Гуннара Байгильдина

Также по теме:

Работники Халбакинского участка ЖКХ Якутии спасли троих детей из горящего дома