Кэнники биэс сылга Саха сиригэр промышленность эйгэтэ тэтимнээхтик сайынна уонна өссө күүскэ тэтимирэр кыаҕы ылла. Маннык санаатын Саха Өрөспүүбүлүкэтин Идэлээх сойуустарын Федерациятын бэрэссэдээтэлэ, норуот хаһаайыстыбатын үтүөлээх үлэһитэ Николай Дегтярев үллэһиннэ. Кини бэлиэтииринэн, итинник балысхан сайдыы өрөспүүбүлүкэҕэ социальнай хайысханы сайыннарарга төһүү күүс буолар.

“Холобура, аҕыйах сыллааҕыта өрөспүүбүлүкэ бэйэтэ киллэринэр дохуота 200 млрд солк эбит буоллаҕына, билигин 320 млрд солк чугаһаан эрэр. Эрдэ өрөспүүбүлүкэ оҥорон таһаарыытын дохуота 1 трлн солк тиийиэ диэн былаанныыр эбит буоллахпытына, билигин 2 трлн солк чугаһаата. Ити дойдуга биир үчүгэй көрдөрүү буолла”, — диир кини.

Билигин федеральнай үп көмөтүнэн сыл ахсын сүүрбэччэ оскуола үлэҕэ киирэр, оттон урут 10-нуу буолааччы. Айсен Николаев өссө 2018 сыллаахха ылыммыт Ыйааҕынан, бюджет үлэһиттэрин хамнаһа сыллата улаатар уонна Ил Дархан уһулуччу хонтуруолугар турар:

“Былырыын, быйыл үлэтэ суох дьон ахсаана муҥутуур аччаата. Бу кэлиҥҥи кэмҥэ Ил Дархан быһаччы өйөбүлүнэн улахан промышленнай тэрилтэлэргэ олохтоох дьону үлэҕэ ылыы лаппа улаатта, үлэ ырыынагар сөптөөх, наадалаах үлэһиттэри бэлэмнээһин тупсан иһэр. Уопсайа 5 сыл иһигэр 47 тыһ. тахса киһи промышленнай тэрилтэлэргэ үлэнэн хааччылынна. Бюджет үлэһиттэрин хамнастарын тупсарыы туһунан анал Концепция ылыныллан, кинилэр хамнастара инфляцияттан итэҕэһэ суох үрдүүр буолла. Ордук чуолаан өр кэмҥэ быһаарыллыбатах специалистар уонна квалификацията суох үлэһиттэр хамнастарын араастаһыытыгар эбии дьаһал ылыллан быһаарыллыбыта”.

Николай Дегтярев этэринэн, өссө улахан болҕомтону Ил Дархан дьиэ кэргэни өйүүргэ уурда: “Федеральнай өйөбүл таһынан өрөспүүбүлүкэттэн көрүллэр эбии төлөбүрдэр дьиэ кэргэн олоҕо туруктаах буолуутугар олук уурдулар. Ол курдук, хас биирдии төрөөбүт оҕоҕо 100 тыһ. солк бэриллэр, оттон кыра дохуоттаах, уустук балаһыанньаҕа киирбит дьиэ кэргэҥҥэ социальнай контрагынан көрүллэр үп кээмэйэ 1 млрд солк тиийдэ. Бу олус тоҕоостоох уонна элбэх оҕолоох ыалга кыах биэрэр көмө буолла”.

“Билигин да Саха сирин инники сайдыытыгар олус киэҥ уонна араас хайысхалаах былааннар, соруктар тураллар. Онон Ил Дархан, Бырабыыталыстыба, Ил Түмэн, олохтоох бэйэни салайыныы уорганнара, уопсастыбаннас бары бииргэ түмсэммит, Федеральнай киини кытта ыкса үлэлэһэн, бар дьоммут олоҕун тупсарарга турунуох тустаахпыт”, — диэн түмүктээтэ Николай Дегтярев.

Еще по теме:

Станислав Жирков: все вместе мы должны построить здоровую нацию