Уус Алдан улууһун баһылыгын солбуйааччыта Михаил Борисов байыаннай дьайыы ыытыллыытын өйүүр. Кини билиҥҥи аныгы үйэҕэ нацизм олох суох буолуохтаах диэн санаалаах:

«Тас дойдулар Арассыыйаны мөлтөтө сатыыллара, араас сааҥсыйалары биллэрэллэрэ — бу биһиги дойдубутун ыһа сатааһын, онон, мин санаабар, дойдубут бэрэсидьиэнэ Владимир Путин саамай сөптөөх быһаарыныыны ылыммыта».

Биһиги бу балаһыанньаҕа түмсүүлээх буолуохтаахпыт, уолаттарбыт этэҥҥэ сылдьалларын туһугар кинилэр дьиэ кэргэттэригэр күүс-көмө, өйөбүл буолуохтаахпыт, диир Михаил Васильевич.

«Биһиги байыаннай дьайыыга сылдьар уолаттарбытыгар барыларыгар бастакы бириэмэҕэ көмө буоллун диэн улуус пуондатыттан 50 тыһ. солк ыытабыт. Ону таһынан араас хабааннаах гуманитарнай көмө, таҥас-сап, ас-үөл хомуйабыт», — сэһэргиир кини.

Уус Алдан улууһун баһылыга, дьаһалта кылаабынай исписэлииһэ, Чэриктэй уонна Найахы нэһилиэктэрин баһылыктара буолан бу күһүн Украинаҕа биир дойдулаахтарын көрсөн кэлбиттэрэ, диэн Михаил Васильевич кэпсиир. Кинилэр уолаттарга дойдуларыттан баһыылка тиксэрбиттэр.

«Биһиги манна баар дьонноругар муус-мас, чох, киинтэн ититиигэ холбонуу о.д.а. хайысхаларга туох кыалларынан көмө оҥоробут. Хас биирдии байыаннай дьайыыга сылдьар уолаттарбыт дьиэ кэргэттэригэр анал дастабырыанньалар туттарыллаллар, улуус иһигэр киинэҕэ, араас култуурнай тэрээһиннэргэ, баанньыкка, успуорт эбийиэктэригэр босхо сылдьыахтаахтар», — диэн түмүктээтэ Михаил Борисов.

«Мүрү саһарҕата» архыыбыттан