Капитоновкатааҕы кырдьаҕастар уонна доруобуйаларынан хааччахтаах дьон олорор дьиэтигэр үөрүүлээх, кэтэһиилээх «Аһаҕас аан» күнэ буолан ааста. Бу тэрээһини Хотугулуу-Илиҥҥи федеральнай үнүбүрсүтүөт, психология салаатын 5 куурсун усутудьуоннара Вера Винокурова, Анна Игнатьева, Аян Николаев үрдүк таһымнаахтык ыыттылар.

Бу тэрээһини Аан дойдутааҕы дьиэ кэргэн күнүн бэлиэтиир бырааһынньыгар сыһыаран, олохтоохтор чугастааҕы уонна куорат эҥэр олорор аймахтарын, чугас дьоннорун ыалдьыттатан харах уулаах көрсүһүү буолла.

«Аһаҕас аан» күнэ сыала-соруга диэн, интернакка олорор дьон бу ааспыт хамсык ыарыы хааччахтааһынынан сибээстээн өр кэмҥэ дьоннорун, аймахтарын кытта көрсүбэккэ олорбут тэйсиилэрин чугаһатан, уйулҕа өттүнэн чөлүгэр түһэрии көмө үлэтэ ыытылынна. Маннык быһыылаах тэрээһин кырдьаҕастар дьиэлэригэр аан маҥнай тэрилиннэ.

Бу куҥҥэ олохтоохтор дьоннорун көрсөн, санаалара көтөҕүллэн үөрүүлэрэ үксээтэ. Аһаҕас аан тэрээһинигэр  сүүрбэттэн тахса ыалдьыт кэлэн аймахтарын, чугас дьоннорун көрсөн, билсэн бардылар.

Түгэнинэн туһанан, Капитоновкатааҕы кырдьаҕастар дьиэлэрин олохтоохторугар, чугас дьонноругар, ону таһынан үлэһиттэригэр күүс-көмө тирэх буолбуттарыгар устудьуоннар улахан махталларын тиэрдэллэр уонна бу маннык тэрээһин өссө да ыытыллыа, үтүө үгэскэ кубулуйуо диэн эрэнэллэр.

Ньургуяна Скрябина