Бүгүн Сахабыт сиригэр Ырыа күнэ бэлиэтэнэр. Бу күнү Ил Дархан Айсен Николаев 2022 сыллаахха олохтоон, ырыаны сөбүлээччилэр, өрөспүүбүлүкэ олохтоохторо үөрэ-көтө бэлиэтииллэр. Чахчыта да саха киһитэ «оҕуһун мииннэ да ыллаан эйээритэр, оһох иннигэр олоҥхолоон барар» диэн мээнэҕэ эппэтэхтэрэ. Амматааҕы О.П. Иванова-Сидоркевич аатынан оҕо айар дьиэтин педагога Анна Матвеева ырыаны олоҕун суола оҥостон, кэрэ нарын ырыатынан дьону үөрдүбүтэ ыраатта. Амма дьоно кинини «Амма маанылаах куолаһа» диэн таптаан ааттаабыттара.
Айылҕаттан бэриллибит ураты куоластаах Анна Матвеева хас биирдии толорор ырыата ис дууһаттан тахсар. «Толорор Анна Матвеева» диэн сценаҕа биллэрдэхтэринэ ытыс тыаһа өрө хабыллан, дьон-сэргэ кинини таптыырын, хас биирдии толоруутун кэтэһиитин биллэрэр.
«Ырыа мин олохпор куруутун арыаллыыр, миигин эмтиир, уоскутар, олоҕум дьиҥ чахчы аргыһа буолар. Ол курдук өссө устудьуоннуу сылдьан, 1993 сыллаахтан ыллаан саҕалаабытым. Аммаҕа аан бастаан сценаҕа 1996 сыллаахха тахсыбытым. Онно «Умай, умай мин чүмэчим» диэн ырыаны толорбутум. Дьэ ол кэмтэн ылан куруутун ыллыы сылдьабын. Ордук Амма туһунан ырыалары сөбүлээн толорбун.
Ил Дархаммыт Айсен Сергеевич Николаев бу маннык ырыа күнүн олохтообута наһаа үчүгэй. Ырыа киһи олоҕун чэпчэтэр, киһи ырыанан санаатын тириэрдэр.
Мин санаабар хайа баҕарар киһи ыллыан сөп. Ордук саха киһитэ ырыа куттаах дии саныыбын. Онон мин ырыан олоҕум аргыһа оҥостон өссө да ыллыы, айа — тута сылдьыам дии саныыбын. Билигин ырыа алыбар оҕолору уһуйабын, ырыаны таптыыр дьүөгэлэрбин түмэн «Дьүөгэлэр» диэн ансамбыл тэрийэн, бу хаһыс да сылбытын үлэлии сылдьабыт. Дойдум дьонум бука барыларын Ырыа күнүнэн истиҥник эҕэрдэлиибин, эһиги олоххут куруутун ырыа курдук кэрэ буоллун», — диэн Анна Матвеева санаатын тириэртэ.
