Эвелина Попова хаартыскаҕа түһэриитэ, Ulus.Media
Ыам ыйын 22 күнүгэр «Сэргэлээх уоттара» киинигэр «Көмүлүөк» хампаанньа уонна Олоҥхо тыйаатыра Дьокуускай куорат олохтоохторун уонна ыалдьыттарын Ньукуолун күнүн көрсөргө ыҥыраллар.
Күнүс 2 чаастан олохтоох оҥорон таһаарааччылар «Сделано в Якутии» холбоһук дьаарбаҥкатыгар урбаанньыттар, норуот маастардара ыһыаҕы көрсө оҥоһуктарын таһаарыахтара.
Киэһэ 6 аҥаартан «Сайын кэлиитэ» диэн дьүһүйүүгэ көрөөччүлэр ыраастаныы сиэрин-туомун ааһыахтара. Саха Өрөспүүблүкэтин култууратын үтүөлээх үлэһитэ, Дархан оһуохайдьыт, алгысчыт Дмитрий Иванов алгыс түһэриэҕэ.
Онтон буолар этно фэшн-дефилеҕа саха мааны таҥаһын айар бастыҥ маастардар, дизайнердар, худуоһунньуктар кыттыахтара. Маастардар Ия Сивцева, Туйаара Уваровская, Тайаана Ли, саха биллэр модельер-худуоһунньуктара Сардаана Алексеева-Заболоцкая, Анжелика Кириллина-Бохо, Таатта-Паттерн Марианна Степанова мастарыскыай, Олоҥхо тыйаатырын кылаабынай худуоһунньуга Сардаана Федотова, Олоҥхо тыйаатырын, «Тыгын Дархан» киинэ худуоһунньуга Дария Дмитриева көстүүмнэрин көрдөрүөхтэрэ.
Биллиилээх хомусчут Альбина Дегтярева бу киэһэ аан бастаан сыана таҥаһын дизайнерын быһыытынан тахсыаҕа.
Бу киэһэ «Көмүлүөк» хампаанньа «Туой АРТ» мастарыскыайа түҥ былыргыттан кэлбит иһити сөргүтэн таптайан оҥорбуттарын сүрэхтиэхтэрэ, Кэриэн Ымыйа төрүт иһиккэ сүгүрүйэр дьүһүйүүнү Олоҥхо тыйаатырын артыыстара көрдөрүөхтэрэ.
«Көмүлүөк» иккис хайысхата — өссө биир төрүт утуму эргитэр «Алтан Арт» симэҕэ.
Үһүс саҥа хайысха — «Этно-стиль» аныгылыы саха таҥаһа. Симэх уонна таҥас дизайнын худуоһунньук Андрей Зыков, дизайнер Катерина Григорьева -Этно оҥордулар.
Бу киэһэни ырыаларынан-тойуктарынан, үҥкүүлэринэн-битиилэринэн ырыаһыттар, музыкааннар Саарын, Дьүрүйээнэ, Дмитрий Артемьев, Анастасия Алексеева, «Айархаан», «Добун» бөлөх, «Эрэл», «Кыталык» үс көлүөнэтин үҥкүүһүттэрэ киэргэтиэхтэрэ.
Өтөрүнэн буолбатах Ньукуолун күнүгэр ыҥырабыт! Ыам ыйын 22 күнүгэр Сэргэлээххэ — «Сайын кэлиитэ»!
Билиэт Олоҥхо тыйаатырын саайтыгар атыыланар. Пушкинскай хаартанан ылыахха сөп!
Билсэр нүөмэрдэргит:
8 967 914-69-06
8 964 422-60-22
Читайте нас в:
