ЫБМ Саха сиринээҕи управлениетын пресс-сулууспатын хаартыската
Өлүөнэ өрүскэ көмүөл, олохтоох муус эрдэттэн уста сыппыт буолан, бэҕэһээ биллибэккэ кэлбитэ уонна бүгүн сарсыарда алын кирбиитэ чохтоох Хаҥалас бөһүөлэгин ааста. Онон, эбэбит элбэх сыллааҕы орто көрдөрүүттэн хойутаабакка, өссө суукка кэриҥэ эрдэ эһиннэ.
Киин куорат аннынан уу таһыма кэлиҥҥи 4 чааска 35 см үрдээн, 418 см буолла. Кутталлаах таһым быһытынан – 1034 см, оттон инженернэй тутуута суох сиринэн – 827 см. Хаҥалас бөһүөлэгин аннынан кэлиҥҥи 4 чаас устатыгар уу 19 см эбиллэн, 718 см тэҥнэстэ (кутталлаах кээмэй 1000 см).
Өрүс сүнньүнэн муус хойуутук устар. Бүгүн көмүөл алын уһуга Нам улууһун сиригэр-уотугар тиийэрэ сабаҕаланар. Манна эмиэ олохтоох муус хамнаабыта хас даҕаны хонно. Алдан муустаах уутун Өлүөнэҕэ кута, киллэрэ турар.
Бэҕэһээ Хаҥалас улууһун Кытыл Дьураатыгар арыыга харан турбут муус төлө баран, уу кыралаан түһэн эрэр: ыксаллааҕа 1631 см буоллаҕына, сарсыарда 1629 см буолла. Сүрүн үөскэ муус хойуутук уста сытар. Өлүөхүмэ долгуна кэлэн, уу үрдээбит. Покровскай куорат аннынан кэлиҥҥи 4 чаас устатыгар уу таһыма 6 см үрдээн, 692 см тиийдэ. Манан уу 1370 см аһардаҕына, кутталлааҕынан ааҕыллар.
Василий Никифоров
Читайте нас в:
