ЫБМ Саха сиринээҕи управлениетын пресс-сулууспатын хаартыската
Гидрометеорологтар иһитиннэрэллэринэн, Өлүөнэ өрүс мууһа Өлүөхүмэ уонна Хаҥалас улуустарын сирдэринэн устар. Көмүөл аллараа кирбиитэ Хаҥалас улууһугар Иһиттэн аллара бэлиэтэнэр. Кытыл Дьураа – Чкалов учаастагыттан аллара муус харан турар, уу эбиллэр.
Сиинэ – Хоточчу учаастагар ырбыы кэҥиир. Дьокуускай – Хаҥалас (чохтоох хайа) икки ардыларыгар олохтоох муус хамныыр. Покровскай – Дьокуускай – Хаҥалас учаастагар өрүс мууһа ыам ыйын 17-18 күннэригэр эстэрэ сабаҕаланар.
Алдан өрүс устатын тухары муус устар. Алын кирбиитэ Батамай гидропоһугар тиийдэ. Уу таһыма сууккаҕа 130 см эбиллэн, 692 см буолла. Онно өрүс мууһа бүгүн сарсыарда хоҥнон барда. Алдан Өлүөнэҕэ таҕыста.
Бүлүү өрүс көмүөлэ Сунтаар, Ньурба, Үөһээ Бүлүү уонна Бүлүү сирдэринэн уста турар. Алын кирбиитэ Бүлүү улууһун сиригэр сылдьар. Хатырык Хомотооҕу гидропост аннынан олохтоох муус хамсыыр, манна бүгүн-сарсын эстэрэ күүтүллэр.
Бүлүү эбэ уута Кириэстээх сэлиэнньэтин аннынан сууккаҕа 305 см түһэн, уу таһыма 905 см буолла. Муус сэдэхтик устар. Сунтаар сэлиэнньэтин аннынан уу кэлиҥҥи сууккаҕа 259 см эбиллэн, 1084 см тиийдэ (кутталлаах таһым – 1330 см). Үөһээ Бүлүү сэлиэнньэтин туһаайыытынан сууккаҕа 41 см үрдээн, 942 см буолла. Манна эмиэ муус сэдэхсийдэ.
Халыма өрүскэ бэҕэһээ киэһэ муус Зырянка бөһүөлэк аннынан хамсаабыта. Онтон бүгүн сарсыарда 4 чааска эһиннэ. Онон нуорматтан 3 күн эрдэлээтэ. Бу эргин уу таһыма сууккаҕа 158 см эбиллэн, 521 см буолбутун бэлиэтииллэр. Ол кутталлаах таһымҥа (850 см) ырааҕынан тиийбэт. Сөмөлүөт түһэр-көтөр балаһатын 550 см тиийдэҕинэ ылар. Ол гынан баран, кэлиҥҥи 4 чааска уу 8 см түспүт. Муус хойуутук устар.
Василий Никифоров
Читайте нас в:
