Саха сирин мөлтөх суоллаах-иистээх уһук нэһилиэктэригэр ынах сүөһү төрүөҕүн тупсаран, аһы-үөлү дэлэтэр сыаллаах өрөспүүбүлүкэ бырабыыталыстыбата таһаарбыт дьаһалыгар олоҕуран, “Сахаагроплем” судаарыстыба бүддьүөтүн тэрилтэтэ элевернэй ферматыгар төлөһүппүт атыыр оҕустарын улуустарга туһаныыга биэрэрин 2022 сылтан саҕалаабыта. Тэрилтэ салайааччыта Алексей Жирков этэринэн, маннык хайысхалаах үлэ сылтан сыл кэҥэтиллэн иһэр тосхоллоох.

Сайынын сиринэн суоллара быстар, улуустар кииннэриттэн ыраах сытар кытыы нэһилиэктэргэ, учаастактарга төрүөхтээх-ууһуохтаах 14 тыһ. кэриҥэ ынах иитиллэр. Онон, кырдьык, уһун кэмҥэ суоттаммыт былааннаах, утумнаах үлэ эрэйиллэр эбит.

Былырыын “Сахаагроплем” СБТ туһааннаах нэһилиэктэр дьаһалталарын сайаапкаларынан, Хаҥалас улууһугар Үөдэйгэ, Кытыл Дьурааҕа уонна Тиит Арыыга 3 племенной холмогор боруода итиэннэ Куорунай улууһугар Маалтааныга, Солоҕоҥҥо 2 племенной симментал боруода атыыр оҕустары босхо туһаныыга биэрбитэ.

Быйыл саас өрөспүүбүлүкэ түөрт улууһугар хайыы үйэ 11 оҕуһу кыһыҥҥы суолу баттаһа ыыттылар. Ол курдук, Үөһээ Дьааҥы улууһугар Улахан Күөлгэ, Хайыһардаахха, Балаҕа, Боронукка, Үҥкүргэ, Суордаахха 6, Мэҥэ Хаҥалас улууһугар 2, Сунтаар улууһун “Кириэстээх” ТХПК-гэр 2 уонна Бүлүү улууһун “Күүлэт-1” кэпэрэтиибигэр 1, барыта симментал оҕустар  тиийдилэр.

Алексей Дмитриевич тоһоҕолоон бэлиэтииринэн, ааспыт сылга 5 нэһилиэккэ көннөрү босхо туһаныыга туттарбыт эбит буоллахтарына, быйылгыттан табаарынай хаһаайыстыбаларга төлөбүргэ биэрэргэ быһаарбыттар. Босхо хаһан баҕарар былдьаһыктаах, айдааннаах буолар баҕайыта. Киһи босхото иҥмэт. Харчытыгар ылбыт хаһаайын бас билэр баайын харыстыыр, эппиэтинэһи бэйэтэ сүгэр.

“Биһиги оҕустарбыт табаары оҥорон таһаарааччыларга быһаччы туһалыыллара ордук көдьүүстээх буолууһу диэн санааттан маннык быһаардыбыт. Ол эрээри, бу үлэни дьаалатынан ыытан кэбиспэккэ, хонтуруолга тутабыт. Биһигиттэн атыыр оҕус ылбыт хаһаайыстыбалар, хаан уруурҕаһыытын таһаарбат туһуттан, 3-түү сыл буола-буола бэйэлэрин икки ардыларыгар атастаһан, оҕустарын уларыталларын ирдиэхпит, тэрийиэхпит”, – диир Алексей Жирков.

“Сахаагроплем” тэрилтэ бэйэтэ эмиэ өрөспүүбүлүкэ племенной хаһаайыстыбаларыгар сакаастаһан, атыылаһан ылар. Үрдүк бородууксуйаны биэрэр, төрдүс көлүөнэҕэ тиийэ биллэр төрүттээх-уустаах ынахтартан төрөөбүт оҕус ньирэйдэри ылан, искусственнай сиэмэлээһин ыстаансыйатыгар тургуталлар, сүүмэрдииллэр. Элевернэй фермаҕа 1-1,5 сыл кэриҥэ иитэн төлөһүтэллэр. Ааспыт сылга симментал, холмогор уонна саха сүөһүтэ боруодалаах 29 оҕуһу ылан туруорбут буоллахтарына, быйыл 35 төбөнү иитэргэ былаанныыллар. Билиҥҥитэ 7-ни аҕалбыттар. Хаалбытын балаҕан ыйыгар диэри ситэриэхтэрэ. Олортон сүүмэрдээһин кэнниттэн сыыйыыттан сыыйыылар эһиил саас-сайын уһук нэһилиэктэр хаһаайыстыбаларыгар “үлэлии” тиийиэхтэрэ.

Василий Никифоров