Улуу Кыайыы 78 сылын көрсө Үөһээ Бүлүүтээҕи 2№-дээх орто оскуолаҕа араас тэрээһиннэр буоллулар. Сылын аайы ыытыллар бырайыак чэрчитинэн Ытык бэлиэ сирдэргэ сүүрүүнэн тиийэн өйдөбүнньүк чааһа тэриллэр. Ол курдук, ыам ыйын 13 күнүгэр 8-10 кылаастартан “Юнармия” оҕолоро “Буойун-суруйааччы Бүөтүр Тобуруокап” диэн ааттаах кылаас чаастарыгар, дьоро миитиҥҥэ, ол кэнниттэн Намҥа суруйааччы түмэлигэр уонна олорбут дьиэтигэр сырыттылар.

“Намҥа 8 кылаас оҕолоро хоһоонунан көрүстүлэр. Оҕолор түмэлгэ уонна бэйиэт дьиэтигэр элбэҕи биллилэр, олус сэргээтилэр. Быйыл үһүс сылбыт. Үс сыллааҕыта Харбалаахха “Сэрии тулаайаҕар” пааматынньыкка, былырыын Софронов Прокопий  Афанасьевич-Боороо дойдутугар Балаҕаннаахха маннык тэрээһин ыытыллыбыта”, — диэн история учуутала Любомира Тихонова кэпсээтэ.

Аҕа дойду сэриитигэр кыттыбыт ытык дьоммутугар маннык тэрээһиннэр урукку да сылларга ыытыллаллара, кинилэр ааттарын үйэтитиигэ араас үлэлэр бараллара. Бу маннык тэрээһиннэр фроҥҥа да, тыылга да Кыайыыны уһансыбыт норуот чулуу уолаттарын, кыргыттарын геройдуу олохторун, сырдык кэриэстэрин үйэтитэргэ туһуламмыт киэҥ хабааннаах үлэ ыччаты дойдуга бэриниилээх буолууга, киэн туттууга үөрэтэр.

               Үөһээ Бүлүүтээҕи 2№-дээх орто оскуола “Сыккыс” пресс-киин корреспондена Анжелина Прокопьева