Үөһээ Бүлүү улууһун Далыр нэһилиэгэр норуоттар икки ардыларынааҕы дьиэ кэргэн күнүн көрсө орто уонна кыра саастаах уолаттарга хапсаҕайдаһан тустууга кэриэстэбил күрэхтэһии үгүс оҕону түмтэ. Ол курдук, тэрээһини байыаннай эпэрээссийэҕэ ытык иэһин толоро сылдьан сырдык тыынын толук уурбут, «Модун санаа» уордьан өлбүтүн кэннэ иҥэриллибит, ыал улахан игирэ оҕолоруттан биирдэстэрэ Мичил Винокуров күн сирин көрбүт күнүгэр сөп түбэһиннэрдилэр.
Ыаллыы Оҥхой, Мэйик уонна Далыр оҕолоро кииристилэр. Кыайыылаахтар Мичил биир дойдулаахтара, бииргэ үөрэммит, үлэлээбит дьоно, аймахтара туруорбут сыаналаах бириистэрин тутан, үөрүүлэрэ муҥура суох. Бу күн кулууп иһэ хайдарынан киһи мустубута олоххо эрэли үөскэтэр. Мичил барахсан үтүө аата кимиэхэ эрэ саҥа суолу спорт эйгэтигэр киллэриэ. Оҕо эрэ барыта ситиһиилээх спортсмен буолбат, бу оҕочоос дьон ыраас өйдөрүгэр, биһиги курдук, Мэйиккэ төрөөбүт, Далырга улааппыт оҕо да дьоруойдуу быһыыны оҥорон, дьонугар-сэргэтигэр кэрэхсэнэр, кэриэстэнэр, ытыктанар, бар дьоно сүгүрүйэр киһитэ буолар эбит диэн санаа саҕыллыбыта оҕолор тутталларыттан-хапталларыттан, сирэйдэриттэн-харахтарыттан көстөр. Кытаатыҥ оҕолор, эһиги эмиэ Мичил Винокуров курдук олоххо көхтөөх, общественнай дьыалаҕа өрүү инники сылдьыҥ, оччоҕо бар дьон махтала өрүү эһигини арыаллыа.
Маннык тэрээһини өрө тутан, күрэх үтүө үгэскэ кубулуйуоҕар эрэнэбит.
Үөһээ Бүлүү, Ороһутааҕы К.С.Чиряев аатынан норуот педагогикатын түмэлин мэтэдииһэ
Валентина Осипова
Читайте нас в:
