Бүгүн, ыам ыйын 12 күнүгэр, күнүс 15.00 чаастан Е.Н. Батенчук аатынан Бүлүүтээҕи ГЭС каскадын ууну хаайар сабыытын арыйан, Бүлүү өрүскэ ууну бырахтарыыны саҕалаатылар.
Маннык дьаһал Росводресурс Өлүөнэ тардыытынааҕы салалтатын бу дьыл муус устар 20 күнүгэр таһаарбыт быһаарыытыгар олоҕуран, сааскы халаан кэмигэр Каскад гидро-тэхиньиичэскэй тутууларын куттала суохтук туһанар туһуттан ыытыллар. Санатан эттэххэ, ааспыт күһүн Бүлүү өрүс баһыгар уһуннук ардаан, “Бүлүү муоратын” таһыма үрдээбитэ. Онтон кыһынын хаар олус өлгөмнүк түстэ. Онон ириэһин кэмигэр үрэхтэринэн-үрүйэлэринэн уу балысханнык киирэ турар.
ГЭС байҕалыттан барыта 5,8 куб. км ууну халтай бырахтарыахтара. Маҥнай саҕаланыытыгар сөкүүндэҕэ 1800-2200 куб. м, онтон сыыйа улаатыннаран, 4900 куб. м диэри ыытыахтара. Быһа холоон, ГЭС “халаана” нэдиэлэ иһинэн түмүктэниэ.
Гидромет Саха сиринээҕи салаатын исписэлиистэрэ сабаҕалыылларынан, күн-дьыл хаамыытын, уу-хаар киириитин кытта ГЭС уутун бырахтарыыны аахсан туран, Сүлдьүкээр – Ньурба – Бүлүү учаастагар уу муҥутуур таһыма элбэх сыллааҕы орто көрдөрүүттэн 0,5-1,0 м үрдүк буолуо. Сунтаар, Ньурба, Үөһээ Бүлүү, Бүлүү нэһилиэнньэлээх пууннарыгар халаан суоһуо суоҕа.
Ол гынан баран, харыы тахсар түбэлтэтигэр быһыы-майгы уларыйыан сөбүн сэрэтэллэр. Ити, чуолаан, намтал сирдэргэ олорооччуларга сыһыаннаах.
Василий Никифоров
Читайте нас в:
