Быйылгы сылы өрөспүүбүлүкэбит Ил Дархана Айсен Николаев Үлэ сылынан биллэрбитэ. Бу сыл чэрчитинэн үлэ кэлэктииптэригэр араас тэрээһиннэр ыытыллаллар, үлэ дьонун чиэстээһин хаһааҥҥытааҕар да далааһыннаахтык тэриллэр. Биир саамай улахан тэрээһининэн “Үлэ киһитэ” Ил Дархан бириэмийэтин туттарыы буолла. Бу манна өрөспүүбүлүкэ бары улуустарыттан үс түһүмэхтээх сүүмэрдээһини 50 бастыҥ үлэһит ааспыта, диэн иһитиннэрэр «Сунтаар сонуннара» хаһыат.
Сунтаар улууһа үлэни өрө туппут, бэйэлэрин өйдөрүн-санааларын, билиилэрин-көрүүлэрин ууран улуус, өрөспүүбүлүкэ сайдыытыгар сүҥкэн кылааттаах элбэх дьонноох. Олортон биирдэстэрэ улууска бэйэ оҥорон таһаарар бородууксуйаны дэлэтиигэ үлэлэһэр Станислав Семенов буолар.
Станислав Иванович бааһынай хаһаайыстыбатын 2015 сыллаахха тэриммит. 2017 сыллаахха Тыа хаһаайыстыбатын министиэристибэтэ ыытар «Саҥа саҕалыыр фермер» куоҥкуруска ситиһиилээхтик кыттан, грант ылбыт. Ол курдук эдэр киһи түргэнник ситэр салааҕа — хонуу куруппааскытын (перепёлка) уонна куурусса иитиитинэн, маны таһынан хортуоппуй үүннэриитинэн дьарыктанар. Кини сылын аайы өрөспүүбүлүкэҕэ, Арассыыйаҕа ыытыллар аграрийдар араас таһымнаах мунньахтарыгар, сийиэстэригэр, сэминээрдэригэр кыттан, санаатын этэн, илдьэ сылдьар уопутун биир идэлээхтэрин кытары үллэстэр үтүө өрүттээх үлэһит киһи.
Эдэр пиэрмэр бу кэлиҥҥи сылларга быраҕыллыбыт сирдэри туһаҕа таһаарыынан утумнаахтык дьарыктанан эрэр. Ол курдук, былырыын 10 гаҕа биир сыллаах оту ыспытыттан 24 туонна оту ылбыта. Мантын инникитин элбэтэр былааннаах. Өссө хас да сыллаах оту эмиэ ыһар.
Кини улуус эдэр пиэрмэрдэрин кытары бииргэ үлэлэһэр, кинилэргэ көмө буолар. Атын хаһаайыстыбаларга сирдэрин хорутан, таҥастаан биэрэр улахан тиэхиньикэлээх. Онон ааспыт сылга кини өҥөтүнэн үгүс хаһаайыстыба туһанан билигин үрдүк үүнүүнү ыларга эрэллээхтик үлэлииллэр.
Станислав саха сатаабатаҕа суох диэн санаанан салайтаран, үлэни чэпчэтэр сыалтан, тыа хаһаайыстыбатын салаатыгар туһалаах тэриллэри айан таһаарарга үлэлиир. Холобур, бэйэтэ толкуйдаан оҥорбут кыһыҥҥы кэмҥэ хотонтон сааҕы таһаарар тиэхиньикэтин Сунтаарга, Ньурбаҕа, Хаҥаласка сөбүлээн туһана сылдьаллар. Мантан атын тыа хаһаайыстыбатын салаатыгар туһаныллар тиэхиньикэлэри айар, элбэҕи толкуйдаан оҥорбут мындыр киһи.
Тыа сирин сайдыытыгар, дьон доруобай аһы сииригэр элбэх билиитин-көрүүтүн, толкуйун ууран үлэлиир эдэр пиэрмэр муус устар 28 күнүгэр Дьокуускай куоракка “Үлэ киһитэ” бириэмийэни тутта. Станислав Ивановичка ситиһиилэри, элбэх сыраны-сылбаны ылар үлэтигэр үрдүк дабайыылары баҕарабыт!
Яина Власьева
«Сунтаар сонуннара» хаһыат уонна СИА хаартыскалара
Читайте нас в:
