ЫБМ Саха сиринээҕи управлениетын пресс-сулууспатын хаартыската

Росводресурс Өлүөнэ тардыытынааҕы салалтата иһитиннэрэринэн, ыам ыйын 10 күнүгэр кэтээн көрүүнэн, Өлүөнэ өрүскэ муус хамсааһынын алын кирбиитэ Иркутскай уобалас сиригэр-уотугар Ленскэй Витимиттэн 230 км үөһэ бэлиэтэнэр.

Улахан эбэҕэ Ленскэй уонна Өлүөхүмэ улуустарыгар уу таһыма сууккаҕа 20-тэн 60 см диэри үрдүүр. Пеледуй өрүс мууһун Өлүөнэҕэ бэҕэһээ, ыам ыйын 9 күнүгэр, киллэрдэ. Ол түмүгэр Пеледуйдааҕы гидропост аннынан муус көтөҕүлүннэ. Өлүөхүмэ өрүс бүгүн киллэрдэ.

Өлүөнэ мууһа Солянка гидропоһун туһаайыытынан ыам ыйын 11-12 күннэригэр (нуорма быһыытынан, ыам ыйын 15 күнүгэр), онтон Покровскай – Дьокуускай учаастагар 16-19 чыыһылаларга (орто көрдөрүү – ыам ыйын 18 күнүгэр)  эстэрэ сабаҕаланар.

Куорунай улууһун үрэхтэригэр уу салгыы түһэр. Өрт сэлиэнньэтэ турар үрэҕэр уонна Бэрдьигэстээх таһынааҕыМатта үрэххэуу 1 миэтэрэ кэриҥэ намтаата эрээри, кутталлаах таһымыттан билигин даҕаны үрдүк.

Кэбээйи улууһун Сииттэ сэлиэнньэтин аттынааҕы Синньигэс Атах үрэххэ уу таһыма бүгүн сарсыарда 8 чаас саҕана 184 см тиийбитэ, оттон кутталлаах таһыма 167 см тэҥнэһэр.

Алдан өрүскэ Томмот – Уус Мил учаастагар муус ыам ыйын 10-13 күннэригэр эстэрэ күүтүллэр. Алдан салааларыгар Ааллаах Үүҥҥэ, Учурга, Маайаҕа муус устар. Алдан өрүскэ Хаандыга бөһүөлэгин аннынан муус хамсаата, уу сууккаҕа 227 см эбиллэр. Угиноуонна Петропавловскай пуостарыгар муус көтөҕүлүннэ.

Амма өрүскэ көмүөл аллараа кирбиитэ Амма улууһугар сылдьар. Муус хойуутук устар. Өрүс аллараа сүүрүгэр Чурапчы улууһун сиригэр-уотугар уонна Таатта Харбалааҕын аннынан муус хамсаан эрэр. Аммаҕа уу таһыма бүгүн сарсыарда 8 чааска 708 см тиийдэ (суукка устатыгар 298 см эбилиннэ), кутталлаах таһыма – 925 см. Амма сэлиэнньэтин аннынан бэҕэһээ киэһэ эстии саҕаламмыта. Ол элбэх сыллааҕы орто көрдөрүүгэ чугас. Муус эстэр кэмигэр уу таһыма нуорматтан миэтэрэ аҥаара намыһах этэ.

Бүлүү өрүскэ уу таһыма сууккаҕа 20-тэн 60 см диэри үрдүүр. Ырбыылар кэҥииллэр уонна муус көтөҕүллэр. Ньурба куорат аннынан муус хамсаан эрэр. Бүлүү салаа үрэхтэрэ быйыл саас элбэх сыллааҕы орто көрдөрүүттэн 3-6 хонук эрдэ эһиннилэр.

Василий Никифоров