Кэбээйи улууһун Мукучу нэһилиэгэр дойду үрдүнэн бэлиэтиир Педагог уонна наставник, Сахабыт сиригэр Үлэ сылларын чэрчитинэн тэрилтэлэр икки ардыларыгар Фестиваль үрдүк таһымнаахтык, өрө күүрүүлээхтик буолан ааста. Кыттыгас тэрилтэлэринээн уопсайа алта тэрилтэ кыттыыны ылла.

Хас биирдии тэрилтэ түөрт көрүҥҥэ күрэхтэстэ. Ол курдук 20 мүнүүтэлээх инсценировка туруоруутугар, биирдии үҥкүү, дуэт, соло нүөмэрдэрин быйылгы анаммыт сылга сыһыаран бэртээхэй толорууларынан барыбытын сөхтөрдүлэр. Бииртэн биир сонун нүөмэр ытыс хабыллар тыаһынан арыалланан, «браво» хаһыынан доҕуһуолланан кыттааччылар сүргэлэрин көтөхтүлэр, фестиваль тыынын өссө күүркэттилэр.

Фестивальга сыанабыл сүбэтэ үс киһиттэн састааптаах үлэлээтэ. Ол курдук Оҕо ускуустуба оскуолатын үҥкүү уонна эстетика кылааһын уһуйааччылара Оксана Иванова, Айталина Макарова ону тэҥэ «Дайан» СК салайааччыта Каролина Кудрина нэһилиэк тэрилтэлэрин талааннаах дьонун сөҕө-махтайа көрдүлэр, иһиттилэр.

Фестиваль түмүгүнэн үһүс миэстэ «Кэнчээри» оҕо уһуйаана буолла. Ийэни, аҕаны солбуйар үтүө сүрэхтээх, киэҥ көҕүстээх иитээччилэрбитигэр ис сүрэхпититтэн махтанабыт. Иккис миэстэни Гимназия тэрилтэтэ ылла. Үөрэҕи өрө туппут араас көлүөнэ учууталларбыт талааннарынан сөхтөрдүлэр, көрөөччүлэр эрчимнээх ытыстарын тыаһынан доҕуһуоллаатылар. Муҥутуур кыайыылаах үрдүк аатын сэрии ветерана, учуутал, өр кэмҥэ салайааччынан үлэлээбит Иван Егорович Левин аатын сүгэр Танара орто оскуолата ылан үөрүүлэрэ үксээтэ. Өрөгөй түгэн өссө биир үрдэл ситиһии бэлиэ күҥҥэ Улуу Кыайыы 78 сылыгар түбэһэ тосхойбутуттан бука бары үөрдүбүт, сүргэбит көтөҕүлүннэ. Онтон анаммыт сыллар ис хоһооннорун толору арыйан «Бастыҥ инсценировка» ааты Прокопий Николаевич Яковлев аатынан Мукучутааҕы врачевнай амбулатория биһирэниэн биһирэннэ. Үрүҥ халааттаах аанньалларбыт толоруулара дохсун ытыс тыаһынан арыалланан көрөөччүлэрбит дуоһуйбуттарыттан астынныбыт.

Улуу Кыайыы өрөгөйдөөх күнүн көрсө Фотозона күрэҕэр Оҕо дьоҕурун сайыннарар киин, саха төрүт оонньууларын көрүҥнэригэр оҕо спортивнай оскуолата, тыа хаһаайыстыбатын туруу үлэһиттэрэ кыттыгас тэрилтэлэрэ биһирэннилэр, ураты көрүүлээх үлэлэрэ кэрэхсэттэ.

Сыанабыл сүбэтэ, көрөөччүлэр, кыттыбыт тэрилтэлэр бары астынан, дуоһуйан, инникитин өссө даҕаны саҥа талааннар тахсан истиннэр диэн баҕа санаалаах тарҕастылар.

Нэһилиэкпитигэр үлэлээн олорор бары тэрилтэлэрбитигэр көхтөөх кыттыыларын, ыытыллар тэрээһиҥҥэ кылааттарын киллэрсибиттэрин иһин махтанабыт. Мэлдьи бу курдук биир тыынынан, биир сомоҕо буолан үлэни-үөрэҕи өрө тутан, кэрэни кэрэхсии сылдьыаҕыҥ диэн баҕарабыт.

Вера Прокопьева, Мукучу