Быйыл саас тыа хаһаайыстыбатын култууратын 49 тыһ. гектарга ыһар сорук турар. Ити иһигэр туораахтаах култуура 10,8 тыһ., сүөһү аһылыгар аналлаах култуура 29,7 тыһ., хортуоппуй 6,7 тыһ. уонна аһаҕастыы олордуллар оҕуруот аһа 1,3 тыһ. гектардыыга ыһыллыахтаах. Ону таһынан 7,1 тыһ. гектардаах ыһыы сирэ паарданыахтаах.
Тыа хаһаайыстыбатын министиэристибэтэ итиччэ ыһыыттан күһүн 10,5 тыһ. туонна туораахтаах култуура, 65,4 тыһ. туонна хортуоппуй, 30,6 тыһ. туонна аһаҕастык уонна бүрүйэн олордуллар оҕуруот аһа хомуйуллуохтааҕын былаанныыр.
Ыам ыйын 4 күнүнээҕи туругунан, улуустарга сааскы ыһыы үлэтигэр күргүөмнээхтик бэлэмнэнэллэр. Ити гынан баран, бу күҥҥэ Алдан, Үөһээ Бүлүү, Кэбээйи, Мэҥэ Хаҥалас, Ньурба, Сунтаар, Өймөкөөн, Уус Маайа улуустарыттан сибидиэнньэ биэрэ иликтэрэ дьикти.
Отчуоттанар кэмҥэ Бүлүү, Ленскэй, Мииринэй, Өлүөхүмэ, Таатта, Томпо, Уус Алдан улуустарын уонна Дьокуускай куорат бааһыналарыгар 7400 туонна органическай уоҕурдууну киллэрдилэр. Быйыл саас Дьокуускайга, Сатайга уонна 8 улууска барыта 9701 туонна киллэриллэрэ былааннанар. Ону таһынан 1006 туонна минеральнай уоҕурдуу былааннанарыттан билиҥҥитэ икки эрэ сиргэ – Аммаҕа 68 уонна Мииринэйгэ 34 туонналыыны киллэрдилэр.
Быйылгы үүнүүгэ 1110 туонна минеральнай уоҕурдуу (770 туонна азофоска, 130 туонна карбамид, 210 туонна диаммофоска) атыылаһыллара былааннаммытыттан тыа хаһаайыстыбатын табаарын оҥорооччулар 1073 туоннатын атыылаһарга дуогабар түһэрсибиттэр. Ити кээмэйтэн, билиҥҥи туругунан, 556 туонната (52 бырыһыана) хаһаайыстыбаларга тиксэриллибит.
Холбоон 329 тыһ. кв. миэтэрэ иэннээх тэпилииссэ бүрүллүбүт. Итинтэн 123 тыһ. кв. миэтэрэтин Ленскэйгэ, 101,2 тыһ. кв. миэтэрэтин Дьокуускайга, 40,6 тыһ. кв. миэтэрэтин Өлүөхүмэҕэ бүрүйбүттэр. Ыһыыга үлэлиэхтээх тыраахтар 64, ыһыыга туттуллар уонна сири таҥастыыр агрегат 53 бырыһыаннара өрөмүөннэммит. Быйыл саас ыһыы үлэтигэр барыта 618 тыраахтар, 194 сиэйэлкэ, 489 сири таҥастыыр сэп туттуллуохтара.
Быйылгы ыһыыга министиэристибэ 1123 туонна бурдук, 1979 туонна сүөһү аһылыгар аналлаах култуура сиэмэлэрин атыылаһарга былааннаан турар. Ити кээмэйтэн 1074 туонна (96 бырыһыана) бурдук сиэмэтэ дуогабардаспыт хаһаайыстыбаларга тиэрдиллибит, атына айаннаан иһэр. Ону тэҥэ 15 туонна (былааннаммыттан 58 бырыһыана) элбэх сыллаах от сиэмэтэ аҕалыллыбыт. Былаан быһыытынан 1106 туонна сиэмэ хортуоппуй ылыллыахтааҕыттан 785 туоннатын (72 бырыһыанын) тиэйэн аҕалбыттар, 68 туонната – суолга.
Сиэмэнэн хааччыйыыга сүрүн оператор тэрилтэлэр – “Сахаагрос” кэпэрэтиип, “Туймаада ҮХАПХ” АУо уонна “Якутагротрейд” ХЭУо. Сиэмэ үс гыммыттан биирин быһаччы дуогабарынан аҕалаллар.
Ыһыы үлэтин бастакынан Амма хаһаайыстыбалара саҕалыахтара. Ол курдук, Кыайыы күнүн кэнниттэн тута үрдүк сиргэ баар бааһыналарыгар киирэргэ былаанныыллар. Ыһыы үлэтэ атын улуустарга ыам ыйын ортотуттан күргүөмнээхтик саҕаланара сабаҕаланар.
Василий Никифоров
Хаартыска: «Эркээйи» хаһыат
Читайте нас в:
