Бэҕэһээ, ыам ыйын 2 күнүгэр, Иркутскай гидрометеорологтара эрдэтээҥи билгэлээһиннэригэр чуолкайдааһын оҥорбуттарынан, Өлүөнэ өрүс Иркутскай уобалас сиригэр-уотугар нуорматтан (элбэх сыллааҕы орто көрдөрүүттэн) 2-6 күн хойутаан эстиэҕэ.

Ити уобаласка Өлүөнэ өрүс мууһа тэһитэ-тэһитэ 10-30 бырыһыан тааҥнаата. Витим өрүс 10 бырыһыан ырбыыланна. Улахан эбэ Качуг бөһүөлэк аннынан ыам ыйын 4 күнүгэр эстэрэ күүтүллэр. Онтон Жигалово бөһүөлэк аннынан ыам ыйын 5, Уус Кукка ыам ыйын 6, Киренскэй куоракка ыам ыйын 11 күннэригэр эстэрин сабаҕалыыллар. Витим ыам ыйын 12 күнүгэр хамсыаҕа.

Сааскы халаан уутун таһыма Качуг аннынан нуорматтан 20-35 см намыһах буолуо. Оттон Жигалово – Уус Кут – Киренскэй туһаайыыларынан итиэннэ Витим өрүскэ нуорматтан 50-110 см намыһах уу кэлиэҕэ. Санатан эттэххэ, Өлүөнэ баһыгар быйыл хаар нуорматтан кыра түспүтэ. Муус хойутаан эстиитэ, бытааннык хамнааһына уу кэмчититтэн төрүөттээх диэн тойоннуохха сөп.

Гидромет сулууспатын Саха сиринээҕи салаата эмиэ бэйэтин сабаҕалааһыннарыгар көннөрүүлэри киллэрдэ. Ол курдук, Өлүөнэ өрүс мууһа хамныырын Витим – Пеледуй учаастагар ыам ыйын 9-12 күннэригэр (нуормата – ыам ыйын 8 күнүгэр), Пеледуй – Ленскэй учаастагар ыам ыйын 12-15 күннэригэр (нуормата – ыам ыйын 12 күнүгэр) күүтэбит.

Ыам ыйын 2 күнүнээҕи туругунан, Өлүөнэ, Алдан, Амма, Бүлүү өрүстэргэ уонна салааларыгар уу таһыма сууккаҕа 2-10 см үрдүүр. Өлүөнэ салааларыгар Нүүйэҕэ уонна Өлүөхүмэҕэ, Алдан өрүс уҥа салаатыгар Маайаҕа ырбыы таҕыста уонна муус үрдүгэр уу халыйда.

Өлүөнэҕэ муус халыҥа Пеледуй бөһүөлэк уонна Өлүөхүмэ куорат анныларынан нуорматтан 16-26 см, Бүлүү өрүскэ Сунтаар – Ньурба уонна Бүлүү куорат учаастактарыгар 3-8 см улахан. Дьааҥы өрүскэ уонна салаатыгар, Адыаччыга, муус 140-170 см халыҥнаах, ол эбэтэр нуорманы 5-11 см аһарар.

Эрдэ иһитиннэриллибитин курдук, Дьокуускай куорат, Куорунай уонна Нерюнгри улуустар сирдэригэр-уоттарыгар, Анаабыр Сааскылаах үрэҕэр хаар олус халыҥнык түспүтэ. Өлүөнэ өрүс орто сүүрүгэр, Амма өрүс үөһээ уонна аллараа сүүрүктэригэр, Алдан өрүс аллараа тардыытыгар хаара халыҥ этэ.

Василий Никифоров