САХА СИРЭ. Муус устар 28 күнэ — ULUS.MEDIA. Табаһыттарга Ил Дархан Айсен Николаев олохтообут «Үлэ киһитэ» премия кыайыылааҕынан таба иитэр хаһаайыстыба дириэктэрэ Роман Туприн талыллыбытын истэн, киэн туттуу иэйиитэ барыбытын кууста. Роман Дмитриевич Туприн бу премияҕа тиксибитэ икки төгүл үөрүүлээх. Кини салайар таба иитэр унитарнай тэрилтэтэ Социалистическай Үлэ Дьоруойа И.К.Спиридонов аатын сүгэр. Быйыл Илья Константинович Спиридонов төрөөбүтэ 110 сылын итиэннэ “Севернэй” совхоз тэриллибитэ 40 сылын туоллулар.

Роман Дмитриевич 28 сыл уопуттаах, тэрилтэтин 2019 сылтан салайар. Таба иитэр хаһаайыстыбаҕа 14 тыһыынча табалаах, республикаҕа саамай бөдөҥҥөрө. Аҕыс ыстаада Үрүҥ Хайаҕа долганнар олорор түөлбэлэригэр баар. Роман Дмитриевич салалтатынан хаһаайыстыбаҕа табаны өлөрөр сыах, тириини таҥастыыр, тигэр мастарыскыайга чуум үлэһиттэрэ иистэнэллэр.Бэйэлэрин маҕаһыыннарыгар астаабыт астарын, тикпит унтууларын, кыһыҥҥы ичигэс таҥастары атыылыыллар, ыстаадалары спутник сибээһинэн хааччыйбыттара. Биир үөрүүлээх түгэнинэн сүлүөт кэмигэр улуус дьаһалтатын баһылыга Эдуард Платонов Анаабыр хоһуун табаһыттарыгар 10 бураны биэрбитэ.
Бу бириэмийэни Ил Дархан Айсен Николаев олохтообута.

Бүгүн Дьокуускайга «Үлэ киһитэ» номинациятын Роман Дмитриевич Ил Дархан Айсен Николаев илиититтэн тутта. Сатабыллаах салайааччы Роман Туприн кэнники табаһыттарга, туундара хоһуун дьоннорун болҕомтоҕо ылар, сыаналыыр, олохпутун-дьаһахпытын чэпчэтэр араас туһалаах бырагыраамалар киирэллэрэ бэрт үчүгэй диэн санаатын үллэһиннэ.

Гуннара Байгильдина