САХА СИРЭ. Муус устар 20 күнэ — ULUS.MEDIA. Ааспыт бээтинсэҕэ, муус устар 7 күнүгэр, Анаабыр улууһугар Дьокуускай куораттан Республикатааҕы киинтэн эмчиттэр дьоҕус биригээдэлэрэ кэлэн, икки нэдиэлэ устатыгар дьоммут-сэргэбит доруобуйаларын туругун көрүөхтэрэ, сүбэлиэхтэрэ-амалыахтара. Хамаанданы республикатааҕы киинин дьоҕус биригээдэтин салайааччыта Артем Ксенофонтов салайар.
Хамаандаҕа терапевт, кардиолог, акушер-гинеколог, эндокринолог, хирург-уролог, ультазвук бырааһа, оториноларинголог, офтальмолог уонна педиатр курдук нэһилиэнньэҕэ олус наадалаах сэдэх идэлээх быраастар киирэллэр. Бастатан туран, улууспут баһылыга Эдуард Платонов салайааччы Артем Ксенофонтовтыын кабинетыгар көрсөн сыалларын чопчулаатылар, айаннарын былааннаатылар. Үрүҥ Хайа участковай балыыһатыгар нэдиэлэ кэриҥэ олохтоохтор доруобуйаларын көрөн, чинчийэн, анализтары ылан, электрокардиограмҥа түһэрдилэр. Оттон бу күннэргэ муус устар 21 күнүгэр диэри Сааскылаахха үлэлиэхтэрэ. Өрөбүллэргэ эмиэ доруобуйабытын көрүөхтэрэ, олохтоохтор, биирдэ кэлбит эмчиттэргэ кытаатан бириэмэ булан көрдөрүнүҥ, чэгиэн доруобуйа – олоххор эн саамай күндү баайыҥ буоларын умнумаҥ!
Гуннара Байгильдина
Читайте нас в:
