САХА СИРЭ. Муус устар 12 күнэ — ULUS.MEDIA. Аныгы үйэ сиэринэн, киһи сааһыттан тутулуга суох бэйэтин баҕарар дьыалатынан дьарыктанара тоҕоостоох. Ол курдук, аныгы кэм устудьуоннара туохтан да тутулуга суох үлэлииллэрэ-хамсыыллара, бэйэлэрин атын эйгэҕэ холонон көрөллөрө киһини үөрдэр. Ол туһунан эдэр, эрчимнээх, Мэҥэ Хаҥаластан төрүттээх видеограф Денис Холмогоровы кытта кэпсэттибит.

 

Барыта кыраттан саҕаламмыта

Дорообо, Денис! Бу эйгэҕэ бастаан хайдах киирбитиҥ туһунан сырдатыаҥ дуо?

—  Видеограф эйгэтигэр киириим кыраттан саҕаламмыта. Бастаан хамсык кэмигэр дьиэҕэ олорон борустуой видеоблогтары YouTube ханаалбар устан саҕалаабытым. Бултуу барарбытын, доҕотторбун кытта бириэмэбитин атаарарбытын, дьарыктанарбытын устар этим. Онтон устар дьарыкпын сөбүлээн, телефоммар стабилизатор атыылаһан рекламалары устан, бартерга үлэлэһэн бэйэбин холонон көрбүтүм.

 

 — Үөрэҕи кытта үлэни дьүөрэлиир төһө ыараханый?

—  Биллэн турар, ыарахаттардаах. Холобур, улахан проектарга атын улуустарга ыҥыраллар, ону үөрэхпиттэн сылтаан аккаастыырбар тиийэбин. Ол иһин үөрэҕим быыһыгар кыракый сакаастарга сылдьабын.

 

Хаһан да хатыламмат, умнуллубат түгэни устар олус эппиэтинэстээх

 

— Эн санааҕар, видео устуутунан дьарыктанар идэ билиҥҥи кэмҥэ төһө тоҕоостооҕуй?

—  Видео устуута диэн сүрдээх эппиэтинэстээх үлэ, тоҕо диэтэр, киһи олоҕор буола турар умнуллубат түгэни устаҕын, ол түгэн хаһан даҕаны хатыламмат. Холобура, уруу киэһэлэрин, юбилейдары, олохторугар биирдэ буолар түгэни видеоҕа устан хатаатахха, үйэлэрин тухары көрөллөр. Мин санаабар, дьарыктанар идэм билигин, нууччалыы эттэххэ, сүрдээх “востребованнай”. Хас биирдии бырааһынньыкка, кэнсиэргэ, ону таһынан атын тэрээһиннэргэ видеограф өҥөтүгэр куруук наадыйаллар.

 

— Тус бэйэҥ ханнык хайысхалаах видеолары устаргын сөбүлүүгүнүй?

—   Видео устааччы буоллун да, эн тутатына “творец” буолаҕын, элбэх хайысхаҕа холонон көрөҕүн. Тус бэйэм билигин элбэх киһилээх open-air кэнсиэрдэри устарбын сөбүлүүбүн. Тоҕо диэтэр кэнсиэр отчуоттуур видеоларын устарга видеограф бэйэтин хараҕынан оҥорон таһаарарын ордоробун.

 

Барыта сыралаах үлэттэн уонна үөрэхтэн тахсар

 

— Видеограф идэтин баһылыырга туох сатабыл нааданый?

—   Билигин бэйэм урукку уонна бу кэмҥэ уста сылдьар үлэлэрбин тэҥнээн көрөбүн. Урукку үлэлэрбэр алҕастарбын көрөммүн, маннык буолуо суохтаах диэн сыыһалары көннөрөргө дьулуһабын. Атын устааччылары кытта көрсөҥҥүн-билсэҥҥин, араас видеолары көрөҥҥүн, мастер-класстарга сылдьан утуу-субуу уопутуран иһэҕин, элбэххэ үөрэнэҕин.

Оттон тугу сатыыр буолуохтааххыный диир эбит буоллаххына, ити ылбыт билиилэргин түмэҥҥин композицияны, перспективаны, кадр, фон, цветокоррекция, видеоҕар сөптөөх матырыйааллары булуохтааххын, ону таһынан көрөөччүгэ тиийимтиэ буоларын гына сценарийы толкуйдуурга үөрэниэххэ наада. Хас биирдии видеограф бэйэтэ портфолиолаах буолуохтаах, оҥорон таһаарбыт үлэлэргин барытын түмүөхтээххин. Барыта сыралаах үлэттэн уонна үөрэхтэн тахсар. Саха сатаабата диэн суох, ылсан истэххинэ барыта табыллан иһиэ!

 

— Кэпсээниҥ иһин махтанабын! Инникигэр өссө үрдүк ситиһиилэри, санаабытыҥ барыта сатанан истин.

 

Айсена Иванова