САХА СИРЭ. Муус устар 7 күнэ — ULUS.MEDIA. Сааскылаахпыт салгыннаах күннэрэ уһааннар сүргэни көтөҕөр, арыт өрүкүтэр тыалларынан, оҕо-аймах дьоҥҥо сандал саас сатыылаан иһэрин биллэрдэ. Анаабыр барахсан киин сиртэн төһө да уһук хоту олордор, дойдубут араас куораттарыттан, улуустарыттан араас идэлээх үлэһит дьон кэлэн, дойдубутун, дьоммутун-сэргэбитин сөбүлээн, үлэлээн-хамсаан кэлэр-барар, сорох дьон букатыннаахтык да олохсуйан хаалар.
Ол курдук, соторутааҕыта, кулун тутар бүтүүтэ, үлэ дьонугар биир кэрэ-дьоро киэһэ буолан ааста. Бу, Үөһээ Бүлүү Маҥаас нэһилиэгиттэн төрүттээх, айымньылаах сурук-бичик үлэһитэ, «Анаабыр уоттара» хаһыат редактора Гуннара Ивановна Байгильдина- Ороһуунускайа олоҕун орто омурҕаныгар үктэммитин ыҥырыылаах бар-дьоно дьоһуннаахтык бэлиэтээтэ.
Саха дьонун үтүө-үгэһинэн, үбүлүөй үөрүүлээх чааһын Алгыс сиэрин-туомун Саха Өрөспүүбүлүкэтин культуратын туйгуна Гавриил Толбонов алҕаан-туойан саҕалаата. Окко түспүт оҥоһуутунан, үбүлүөйдээх киһибитигэр күн сирин көрдөрбүт ийэлээх аҕатын билиһиннэрэбин: Гуннара Ивановна күн-күбэй ийэтэ Степанида Михайловна Иванова- агроном үөрэхтээх, билигин Дьокуускай куоракка оҕолорун, сиэннэрин, хос сиэннэрин ситиһиилэринэн угуттанан дьоллоохтук олорор. Улуукан ааттаах, айдарыылаах аҕата Үөһээ Бүлүү Ороһутуттан төрүттээх, Үөһээ Бүлүү бочуоттаах олохтооҕо, балтараа сүүстэн тахса ырыа тылын суруйбут поэт, хотуннан-соҕурууннан сураһыллар, ахтыллар норуот эмчитэ, көрбүөччү, норуоттар икки ардыларынааҕы «Планета тиллиитэ» диэн ассоциация академига, профессора, Петр I, академик Иван Павлов уонна академик Владимир Вернадскай орденнар кавалердара, Россия суруйааччыларын уонна суруналыыстарын Сойуустарын чилиэнэ, Саха Өрөспүүбүлүкэтин культуратын үтүөлээх үлэһитэ, Саха Өрөспүүбүлүкэтин үөрэҕириитин туйгуна, 42 кинигэ ааптара Уйбаан Ороһуунускай-Иван Еремеевич Иванов буолар.
Гуннара Ивановна педагог, саха тылын уонна литературатын учуутала идэтин талбыта. М.К.Аммосов аатын сүгэр СГУ филологическай факультетын, саха салаатын бүтэрээт, айылҕаттан айдарыылаах аҕатын туйаҕын хатаран, сахабыт сирин улуустарынан айар үлэтин саҕалаабыта. Ол курдук, «Саҥа олох» Чурапчы улууһун хаһыатыгар корреспонденынан, салгыы Күөх Ньурбаҕа, Сунтаарга, төрөөбүт дойдутугар Үөһээ Бүлүүгэ “Хотун Бүлүү” студиятыгар «Саха” КИНХ филиалларыгар ыытааччынан, суруналыыһынан, онтон Дьокуускай куоракка «Күрүлгэн» литературнай альманахха, «Вести Саха» ГТРК телевидениетын каналыгар корреспонденынан үлэлээбитэ.
Дьэ, бу кэнниттэн 2011 сылтан олоҕун суолун хоту дойду Анаабырын кытта ситимнээбитэ. “Анаабыр уоттара” хаһыат кылаабынай редакторынан ананан үс сыл үлэлээн баран, Өлөөҥҥө «Сардаҥа” хаһыакка түөрт сыл кылаабынай редактордаабыта, үгүс араас тэрээһиннэри республикаҕа сырдаппыта. Бу кэннэ республикатааҕы «Далбар хотун» дьахтар сүрүн сурунаалын кылаабынай редакторынан ситиһиилээхтик үлэлии сылдьан, иккистээн Анаабырга редакторынан ананан кэлбитэ.
“Анаабыр уоттара” дьоҕус тэрилтэтэ өр кэмҥэ ремоннаммакка турбут дьиэтин сөргүтэн, мебелин саҥардан, саҥа “Дупло” бэчээттиир массыынаны аҕалтаран үлэтин сэргэхтик саҕалаабыта. Сайдыылааах үлэ билиҥҥи саҥа технологияларын туһанан, араас хабааннаах улуус бары тэрээһиннэрин тиһигин быспакка радионан, күөх экранынан, куйаар социальнай ситимнэринэн улууска, республикаҕа сырдата олорор, дьоҥҥо-сэргэҕэ киэҥник биллэр бастыҥ үлэһит, айымньылаах журналист, ытыктанар репортер буолар. Салайааччы сатабыллаах сүбэтинэн, редакция коллектива билиҥҥи тэтимнээх үлэтин биир кэмҥэ дьүөрэлээн, үлэ сырдык суолунан инникигэ эрэллээхтик хардыылыыр.
Ол курдук, редакция кэскиллээх үлэтин түстээн, Гуннара Ивановна эдэр коллегатын, олохтоох долган ыччатын Владимир Большаковы идеологическай сырдатар-иһитиннэрэр маассабай үлэ ымпыгар-чымпыгар уһуйар-такайар сүбэтин тэҥҥэ үллэстэр.
Гуннара Ивановна олоҕун аргыһа төһө да кылгас кэмҥэ олорон аастар, икки кэрэчээн кыыс оҕолонон, икки уол сиэннэр мичээрдэринэн угуттанан, күндү дьонун туһугар ыраах, хоту сирдэринэн кытаанах киэҥ санаалаах, холку үлэһит буолан, үлэ-хамнас үөһүгэр сылдьар сүрүн тутаах киһи буолар.
Быйылгы сылбыт Сахабыт сиригэр Үлэ сылынан биллэриллэн турар. Онно олоҕуран, үлэ киһитин чиэстээн-сыаналаан туран, «Анаабыр национальнай (дулгаан-эбэҥки) улууһун социальнай-экономическай сайдыытыгар сүрүн кылааты киллэрбитин иһин” бочуоттаах бэлиэни улуус баһылыгын бастакы солбуйааччыта Василий Григорьевич Поскачин үөрүүлээх быһыыга-майгыга Гуннара Ивановнаҕа туттарда.
Күндү коллегабытыгар баҕарабыт кытаанах-чэгиэн туругу, чөл куттаах эйэлээх олоҕу, айымньылаах үлэҕэр саҥаттан-саҥа арыйыылары, сытыы бөрүөлээх талааныҥ өрөгөйүнэн үрдүк чыпчаалларын дабайан, үлэ сырдык суолугар аартыгыҥ куруук аһаҕас буоллун!
Сарыада, “Анаабыр уоттара” хаһыат
общественнай кэрэспэндиэнэ
Читайте нас в:
