САХА СИРЭ. Муус устар 5 күнэ — ULUS.MEDIA. Хаҥалас улууһун соҕуруу эҥэр сытар нэһилиэктэрэ Сиинэ үрэҕиттэн хаайтаран саас-күһүн массыына сырыыта суох хаалан эрэйдэнээччилэр. Олохтоохтор да, нэһилиэк салалталара да Сиинэ үрэҕэр муоста тутуутун араас таһымнаах мунньахтарга сылын аайы туруорсаллар. Кинилэри сэргэ, Өлүөхүмэ улууһа эмиэ бу үрэх муосталанарыгар интэриэстээх.

Кыһалҕалаах боппуруос быйыл дьэ оннуттан хамсаата: СӨ Тырааныспарга уонна суол хаһаайыстыбатыгар министиэристибэтэ буор босхо понтоннай муоста биэрэн, күн бэҕэһээ Сиинэҕэ икки массыынанан тиэйэн таһаардылар. Билигин Өлүөхүмэттэн Ленскэй улууһун Нүүйэ үрэҕэр турбут муостаны аны 3 массыынанан аҕалыахтара.

— Өр сыллаах туруорсуубутун ылынан СӨ Тырааныспарга уонна суол хаһаайыстыбатыгар министиэристибэтэ понтоннай муоста анаабытыгар махталбыт муҥура суох. Улууспут уонна Өлүөхүмэ улууһун дьаһалталара кыттыһан транспортировкабытыгар көмөлөстүлэр. Быйыл Нүүйэ үрэҕэр муоста тутуллар буолан, онно туһаныллыбыт понтон муоста биһиэхэ бу күннэргэ аҕалыллыа. Билигин муостаны үлэлэтэр тэрилтэни быһаарарга сүбэлэһэбит. Биллэн турар, тиэхиньикэлээх тэрилтэ эксплуатациялыыра ирдэнэр. Оннук тэрилтэнэн биһиэхэ Олох-дьаһах хомунаалынай хаһаайыстыбата буолар. Муостаны күһүөрү, үрэх уута түстэҕинэ таҥан туруорарга былаанныыбыт, — диэн Сиинэ нэһилиэгин баһылыга Айдан Леверьев иһитиннэрдэ.

Ольга Гермогенова, «Хаҥалас» хаһыат