Эбээн Бытантай национальнай улууһугар Хотугу норуоттар IV-с өрөспүүбүлүкэтээҕи Оонньууларыгар мустубут табаһыттары «Мобильный доктор» бырагыраама сүнньүнэн кэлэ сылдьар 12 исписэлиистэн састааптаах быраастар биригээдэлэрэ көрөллөр.
Сыл баһыгар-атаҕар биирдэ бөһүөлэккэ киирэр табаһыттар өрөспүүбүлүкэ таһымнаах тэрээһиҥҥэ кыттаары мандатнай хамыыһыйаны ааһар кэмнэригэр, улуустааҕы киин балыыһаҕа медицинскэй чинчийиини бардылар. Төрүт дьарыгы утумнааччылары ордук болҕомтоҕо ылан, уочарата суох киллэрэн, улууһуттан тутулуга суох көрөн саҕалаатылар.
Мобильнай биригээдэ быраастара дьоҥҥо эйэҕэс сыһыаннаахтарын, хас биирдии киһини үөрэ-көтө көрсөллөрүн тыа дьоно бэлиэтииллэр. Аан маҥнай регистратураны ааһалларыгар регистратор кыыс Марфа Иванова уонна олохтоох регистратура сиэстирэтэ Саина Слепцова киниэхэ көмө буолан, барыларын сирдээн, ыйан-кэрдэн, быһааран биэрэн, табаһыппыт диэтэ эрэ, илиилэриттэн сиэтэн кэриэтэ арыаллыыллар.
«Мобильнай биригээдэ быраастара кытыы сытар Кустуур, Дьарҕаалаах нэһилиэктэригэр сылдьан нэһилиэнньэ доруобуйатын туругун көрдүбүт, онкомаркер, гепатитка ИФА, гормоҥҥа, ВПЧ жидкостнай цитологияҕа анаалыс ыллыбыт. Аны бу күннэргэ, чуолаан муус устар 6 күнүгэр диэри, улуус киинигэр — Саккырыырга үлэлиибит.
Медицинскэй десант сүрүн сыала-соруга диэн дьон доруобуйатын туругун көрөн, ыарыыны эрдэттэн сэрэтии, сүбэ-ама биэрии, маны тэҥэ ыарыыларынан көрөн учуокка ылыы, салгыы Дьокуускай куораттан кэтээн көрүү, арыаллааһын буолар.
Медицинскэй чинчийии бастакы көрүүтүгэр сүрэх, тымыр, эндокриннай систиэмэ уонна сүһүөх ыарыылара үгүстэрин бэлиэтээтибит. Ыарыыны эрдэттэн сэрэтэр туһуттан олохтоохтор диспансеризацияны булгуччу ааһыахтарын наада. Медицинскэй чинчийиини ааһарга өрөбүл күн бэриллэр, хамнас төлөнөр.
Хоту сиргэ усулуобуйа ыарахан, анал исписэлиис тиийбэтэ биллэр. «Мобильнай доктор» бырагыраама Ил Дархан Айсен Николаев көҕүлээһининэн үлэлээн, 13 арктическай улууһу сыл устата хабыахтаах.
Түгэнинэн туһанан, Эбээн Бытантай улууһун олохтоохторун анал исписэлиистэргэ кэлэн көрдөрөн ыарыыны эрдэттэн сэрэтиҥ», — диэн өрөспүүбүлүкэтээҕи быраастар мобильнай биригээдэлэрин салайааччыта Артем Ксенофонтов ыҥырда.
Бэлиэтээн эттэххэ, быраастар мобильнай биригээдэлэрэ улууска кулун тутар 23 күнүттэн үлэлээн, бастатан туран, уустук суоллаах-иистээх ыраах сытар Кустуур, Дьарҕаалаах нэһилиэктэринэн сылдьан 222 киһини, ол иһигэр 110 аҕыйах ахсааннаах хотугу норуоттар бэрэстэбиитэллэрин, 102 оҕону көрдүлэр.
Тыа сирин олохтоохторо, ордук саастаах дьон киин сиргэ айаннаабакка, медицинскэй чинчийиини миэстэтигэр ааһалларыттан үөрэллэр. Ону ааһан кытыы нэһилиэккэ травматолог-ортопед сүһүөхтэрэ хамсаабат буолбут дьону блокадалары оҥорон хамсатта, онтон хирург-быраас, Эбээн Бытантай улууһугар үлэлии сылдьыбыт Василий Самсонов суһал көмөнү оҥордо диэн, олохтоохтор махтанан туран кэпсииллэр. Кэлбит быраастар сорох ыарыһахтары өрөспүүбүлүкэтээҕи балыыһаларга бэлэмнээтилэр, эмтээһиҥҥэ сүбэлээтилэр.
Маны тэҥэ «Сахафармация» тэрилтэтэ улууска эмп ыыппытын аҕаллылар.
Сардана Копырина
Читайте нас в:
