Уһук Илин күүстээх бөҕөстөрө бу өрөбүллэргэ Аллараа Бэстээххэ күөн көрсүөхтэрэ

Саргылана Федорова 31.03.23 17:34

САХА СИРЭ. Кулун тутар 31 күнэ — ULUS.MEDIA. Бу өрөбүллэргэ, муус устар 1-2 күннэригэр Мэҥэ Хаҥалас Аллараа Бэстээҕэр Т.А. Пинегин аатынан «Парус» спортивнай комплекска, 24-гэр диэри саастаах бөҕөстөр көҥүл тустууга Уһук Илин федеральнай уокуругар бастыыр иһин күрэхтэһиилэрэ ыытыллар.

Бу күрэхтэһиигэ Саха сирин хамаандатыттан элбэх бөҕөс кыттара күүтүллэр. Биллэрин курдук, Уһук Илин зонатын түһүлгэтигэр ситиһиилээхтик кыттыбыттар – бу саастаахтарга ыытыллар Россия күрэхтэһиитигэр кыттар быраабы ылыахтара. Онон, туһугар эппиэттээх күрэхтэһии диэххэ сөп. Манна билиҥҥи кэмҥэ ситиһиилээхтик туста сылдьар Любомир Ашеин, Олег Фомин, Станислав Свинобоев, Никита Софронов, Никита Хабаров курдук күүстээх бөҕөстөрбүт кытталлар.

Биһиги билгэлээһиммитинэн бэйэбит уолаттарбытыттан мэтээл иһин сүрүннээн тустуохтара:

57 кг – Любомир Ашеин, Харысхал Григорьев, Дархан Игнатьев, Валерий Андросов, Егор Явловскай.

61 кг – Уйгулан Иванов, Валентин Бурнашев, Манчаары Ильинов, Александр Авелов, Дмитрий Илларионов.

65 кг – Александр Иванов, Петр Парников.

70 кг – Олег Фомин, Вальтер Владимиров, Алексей Данилов, Уйгулан Протодьяконов.

74 кг – Станислав Свинобоев, Албан Аввакумов, Николай Сивцев.

79 кг – Василий Кириллин, Андриан Ленскэй.

97 кг – Никита Софронов.

125 кг – Никита Хабаров, Эдуард Максимов.

Биллэн турар, сүрүн утарсааччыларбытынан Бурятия Республикатын тустууктара буолуохтара. Күрэхтэһии туһунан «Дьулурҕан» сайтыгар, Телеграм уонна ютуб каналларыгар төһө кыалларынан сырдатыахпыт. Күрэхтэһии күннэринэн программатын сайтан билсиэххитин сөп.

Күрэхтэһии программата

Кулун тутар 31 күнэ, бээтинсэ

11:00-16:00 Кыттааччылары бэлиэтээһин.

16:00-17:00 Бары ыйааһыннарга кыттааччылар сэрэбиэйдэрэ.

17:00-18:00 Судьуйалыыр коллегия хамаандалар бэрэстэбиитэллэрин кытта сүбэ мунньаҕа.

Муус устар 1 күнэ, субуота

08:00-08:30 Кыттааччылар ыйааһыннаныылара.

11:00-20:00 Барыллааһын уонна финалга тахсар иһин тустуулар.

12:00-12:30 Күрэхтэһиини үөрүүлээхтик аһыы.

Муус устар 2 күнэ, өрөбүл

08:00-08:30 Кыттааччылар ыйааһыннаныылара.

11:00-16:00 «Уоскутар» бөлөх тустуулара, финаллар. Кыайыылаахтары наҕараадалааһын.