САХА СИРЭ. СУНТААР УЛУУҺА. КУЛУН ТУТАР 29 КҮНЭ — ULUS.MEDIA. Сунтаар нэhилиэгин В.Г. Павлов аатынан начальнай оскуолаҕа Саха Республикатын үөрэҕириитин туйгуна, РФ уопсай үөрэхтээһинин бочуоттаах үлэһитэ Вадим Егорович Семенов сырдык кэриэһигэр алын кылаас оҕолоругар көҥүл тустууга күрэхтэһии буолан ааста.
Вадим Семенов Сунтаар улууһугар Тойбохойго, Аллаҥаҕа нуучча тылын уонна литературатын учууталынан, дириэктэринэн үлэлээбитэ. Үлэлиир сылларын тухары спорду өрө тутара, өйүүрэ, тренердэри кытары ыкса билсэрэ, үлэлэһэрэ, начальнай оскуола иһигэр тустууга, хапсаҕайга күрэхтэһиилэри бастакынан киллэрбитэ.
Күрэхтэһии үөрүүлээх арыллыытыгар Сунтаар улууһун баһылыга Анатолий Григорьев кэлэн, эдэр бөҕөстөргө ситииһилэри уонна доруобуйаны баҕарда, чөл олоҕу тутуһарга алгыс тылын эттэ. Эдэр кэскилээх тустууктары көрөн астынна.
Күрэхтэһии сүрүн суолтата диэн, чөл олоҕу тутуһуу, эдэр оҕолору спорка сыһыарыы уонна Вадим Егорович Семеновы кэриэстээһин буолар. Быйыл сэттис төгүлүн ыытыллар күрэхтэһиигэ барыта 100 оҕо уон ыйааһыҥҥа күрэхтэстэ. Сунтаар нэһилиэктэриттэн, Сунтаар бэйэтэ, Сиэйэ, Күндэйэ, Бүлүүчээн, Тойбохой уонна Ньурбаттан тиийэ кэлэн, түһүлгэни киэргэттилэр. Бу күрэхтэһииттэн биллэр тустууктар, билигин республика, Россия лидердэрэ Лев Павлов, Кэскил Семенов, Юлиан Григорьев, Аслан Трофимов, Харысхал Григорьев, Денис Максимов уо.д.а. үүнэн тахсыбыттара.
Судьуйаларынан – республикатааҕы категориялаах судьуйалар: Эллэй Дмитриев, Пётр Сидоров, Александр Львов үлэлээтилэр. Күрэхтэһии түмүгүнэн “Кыайыыга дьулуурун иһин”, “Бастыҥ техникатын иһин”, “Кэскиллээх тустуук”, “Саамай кырачаан тустуук” диэн анал бириистэр туттарылыннылар.
Түмүккэ абсолютнай тустуу буолла, онно Саян Игнатьев (3 №-дээх оскуола 4-с кылааһын үөрэнээччитэ) финалга Семён Павловы (1-кы №-дээх оскуола 4-с кылааһын үөрэнээччитэ) кыайда.
2009 сылтан икки сыл буола-буола Вадим Егорович аатыгар тустууга күрэхтэһии тэриллэн ыытыллар. Бу түһүлгэни начальнай оскуола коллектива, В.Е. Семенов дьиэ кэргэнэ тэрийэн ыытар. Күрэхтэһии таһыма өссө улаатар, кэҥиир кэскиллээх. Атын ханнык эмэ сиргэ маннык, алын кылаас уолаттарыгар тустууга улуустааҕы күрэхтэһии ыытыллар дуо?
Өссө биирдэ махтанабыт В.Г. Павлов аатынан алын оскуола дириэктэригэр Назаров Алексей Семёновичка, оскуола коллективыгар уонна Семеновтар дьиэ кэргэҥҥэ. Вадим Семёнович аата аар саарга аатыра турдун! Үөрэппит, такайбыт оҕолоруҥ, доҕотторуҥ, тустууктар, сунтаардар сүрэхтэригэр өрүү баар!
Владимир Данилов, Сунтаардааҕы оҕо спортивнай оскуолатын тренерэ
Читайте нас в:
