САХА СИРЭ. Кулун тутар 29 күнэ — ULUS.MEDIA. Өлөөн эбэҥки национальнай оройуонун олоҕу-дьаһаҕы хааччыйар коммунальнай тэрилтэтин бөҕө туруктаах оҥоруутун хааччыйбыт үлэһит династиялартан биирдэстэринэн — Никифоровтар аҕа ууһун үлэһит династиялара буолар. Саха Өрөспүүбүлүкэтин коммунальнай холбоһугун Өлөөн эбэҥки национальнай оройуонунааҕы салаатын профсоюзнай тэрилтэтин биэрбит сэбидиэнньэтинэн Никифоровтар династияларын олоҕу-дьаһаҕы хааччыйар коммунальнай тэрилтэҕэ үлэлээбит уопсай ыстаастара 178 сылга тэҥнэһэр эбит.

Никифоровтар үлэһит династияларын төрүттээччинэн Никифоров Гаврил Федотович буолар. Кини 1916 сыллаахха кулун тутар ый 20 күнүгэр Саха уобалаһын Бүлүү оройуонугар Мастаах нэһилиэгэр төрөөбүтэ, омугунан — саха, ситэтэ суох орто үөрэхтээх, Өлөөн сэлиэнньэтин тутуутугар үлэҕэ кэлбитэ. Аҕа дойду улуу сэриитин кыттыылааҕа, сэрии хонуутугар хорсун быһыыны көрдөрбүтүн иһин «Хорсунун иһин» бойобуой мэтээл кавалера.

Гаврил Федотович коммунальнай хаһаайыстыба систиэмэтигэр 25 сыл үлэлээбит ыстаастаах. Үлэтин болуотунньугун коммунальнай хаһаайыстыбаҕа 1960 сыл тохсунньу ый 20 күнүттэн саҕалаабыт уонна салгыы үлэ уопутун мунньунан, тэрийэр дьоҕура сайдан үлэни тэрийээччинэн 7 сыл үлэлээбит. Дьону кытта үлэлиир уопуттаах, үлэтигэр үрдүк эппиэтинэстээх, олоҕу-дьаһаҕы хааччыйар тэрилтэ үлэтин билэр-көрөр үлэни тэрийээччини оччотооҕу оройуон салалтата 1968 сыл олунньу ый 1 күнүттэн олоҕу-дьаһаҕы хааччыйар коммунальнай тэрилтэ начальнигынан олус эппиэтинэстээх үлэтигэр анаан үлэлэтэллэр. Ол кэннэ оройуон олоҕу-дьаһаҕы хааччыйар коммунальнай тэрилтэтин үлэтин 17 сыл ситиһиилээхтик уонна тэриниилээхтик салайан, бочуоттаах сынньалаҥҥа 1985 сыллаахха барыар диэри, бастыҥ үлэлээх тэрилтэ оҥорбута. Холобурун ыллахха, 1973 сыллаахха Бүтүн Россиятааҕы тыа сэлиэнньэлэрин тупсаран оҥорууга Өлөөн сэлиэнньэтэ бастакы миэстэҕэ тахсан кыайыы өрөгөйүн өрө туппута.

Гаврил Федотович 8 оҕолооҕуттан 4 оҕото кини коммунальнай хаһаайыстыбаҕа үлэлээбит дьаныардаах үлэтин батыһаннар олоҕу-дьаһаҕы хааччыйар тэрилтэҕэ ситиһиилээхтик үлэлээн кэллилэр. Улахан кыыһа Михайлова Александра Гаврильевна бочуоттаах сынньалаҥҥа барыар диэри, 16 сыл устата котельнай кочегарынан ситиһиилээхтик үлэлээбитэ.

Улахан уол Николай коммунальнай хонтуора үлэтигэр болуотунньугунан, онтон тракториһынан 13 сыл үлэлээн бочуоттаах сынньалаҥҥа барбыта. Кини үлэҕэ үрдүк көрдөрүүтүн иһин СӨ Президенин уурааҕынан «Гражданскай килбиэн» бэлиэнэн наҕараадаламмыта, Өлөөн эбэҥки национальнай оройуон бочуоттаах олохтооҕо.

Николай Гаврильевич кэргэнэ Сергеева Майя Николаевна, уон оҕо ийэтэ, алмаас көрдөөһүнүн кыттыылааҕа. Олоҕу-дьаһаҕы хааччыйар коммунальнай тэрилтэҕэ 20 сыл үлэлээн баран бочуоттаах сынньалаҥҥа барбыта. Үлэҕэ үрдүк ситиһиилэрин иһин оройуон Сэбиэтин уурааҕынан Өлөөн эбэҥки национальнай оройуонун бочуоттаах олохтооҕун үрдүк аата иҥэриллибитэ.

Үлэһит дьону удьуордаан Николай Гаврильевичтаах кыыстара Эверстова Маргарита Николаевна, икки оҕо ийэтэ, олоҕун үлэтин коммунальнай хаһаайыстыбаны кытта сибээстээн, 34 сылын олоҕу-дьаһаҕы хааччыйар коммунальнай тэрилтэҕэ ситиһиилээхтик үлэлиир. Кини тэрилтэ техническэй үлэһиттэн саҕалаан, олоҕу-дьаһаҕы хааччыйар тэрилтэни кытта бииргэ үүнэн-сайдан, күн бүгүн үрдүк үөрэҕи ситиһиилээхтик бүтэрэн коммунальнай холбоһук Өлөөннөөҕү салаатын сүрүн экономиһынан үлэлиир. Маргарита Николаевна үлэ кэлэктиибин ортотугар убаастабылынан туһанан тэрилтэ профсоюһун бэрэссэдээтэлэ, кэккэ сылларга оройуон уонна нэһилиэк Сэбиэтин депутатынан быыбарданан ситиһиилээхтик үлэлиир.

Орто уол Никифоров Михаил Гаврильевич 1961 сыллааҕы төрүөх, үлэтин тыа хаһаайыстыбатыгар саҕалаан баран билиҥҥи бириэмэҕэ 16 сылын Өлөөн оройуонун олоҕу-дьаһаҕы хааччыйар тэрилтэҕэ суоппарынан уонна автомеханигынан ситиһиилээхтик үлэлиир. Кэргэннээх, биэс оҕолоох. Үлэҕэ үрдүк ситиһиитин иһин СӨ коммунальнай холбоһугун Бочуоттаах грамотатынан бэлиэтэнэн турар.

Гаврил Федотович кыра уола Александр Гаврильевич, 1965 сыллааҕы төрүөх, аҕатын туйаҕын хатаран Өлөөн оройуонун олоҕу-дьаһаҕы хааччыйар коммунальнай тэрилтэлэр 10-с сылын үлэлиир, кэргэннээх, үс оҕолоох. Чөл олоҕу өрө тутан спорт бары көрүҥнэринэн дьарыктанар, оройуон сүүмэрдэммит хамаандатын чилиэнэ, үлэтигэр үрдүк көрдөрүүтүн иһин СӨ коммунальнай холбоһугун Бочуоттаах грамотатынан бэлиэтэнэн турар. Кини бильярд спордун оройуоннааҕы федерациятын бэрэссэдээтэлинэн быыбарданан ситиһиилээхтик үлэлиир.

Никифоровтар үлэһит династияларын Гаврил Федотович сиэннэрэ салҕааннар олоҕу-дьаһаҕы хааччыйар коммунальнай тэрилтэҕэ сүрэхтэрин баҕатынан үлэлээннэр үлэһит династия үтүө дьыалаларын күн бүгүн салгыыллар.

Ол курдук, Александр Александрович олоҕу-дьаһаҕы хааччыйар коммунальнай тэрилтэҕэ 6-с сылын котельнай операторынан бэриниилээхтик үлэлиир. Кини 1985 сыллааҕы төрүөх, орто техническэй үөрэхтээх, «Молодежнай» котельнай операторынан 6-с сылын үлэлиир, үлэтигэр бэрээдэктээх, эппиэтинэстээх үлэһит, үлэҕэ дьуулурун иһин СӨ Коммунальнай холбоһугун Махтал суругунан бэлитэнэн турар, кэргэннээх, үс оҕолоох.

Күн бүгүн СӨ коммунальнай холбоһугун Өлөөн оройуонунааҕы салаатын салайааччытынан Никифоровтар үлэһит династияларын төрүттээбит Гаврил Федотович улахан кыыһын уола Михайлов Василий Васильевич ситиһиилээхтик үлэлиир.

Кини 1972 сыллааҕы төрүөх, үрдүк техническэй үөрэхтээх, кэргэннээх, икки оҕолоох, олоҕу-дьаһаҕы хааччыйар коммунальнай тэрилтэҕэ оператортан саҕалаан тэрилтэ кылаабынай инженерынан уонна салайааччынан үлэлээбит 20 сыл ыстаастаах идэтийбит коммунальнай хаһаайыстыба үлэһитэ буолар.

Василий Васильевич СӨ олоҕу-дьаһаҕы хааччыйар коммунальнай холбоһугун уонна Өлөөн эбэҥки национальнай оройуонун дьаһалтатын кытта тэрилтэ сүрүн фондаларын саҥардыыга былааннаах үлэни тэрийэн ыытан, тэрилтэ 9 кыбартаалынай хочуолунайдар барыбырайыактынай хочуолунайдар буолаллара хааччылынна уонна сылын ахсын «Фонд реформирования ЖКХ» бырагырааматыгар үлэлэһэн иитиини биэрэр турба ситимэ былааннаахтык саҥардыллара хааччыллар.

Олоҕу-дьаһаҕы хааччыйар коммунальнай тэрилтэ кэлэктиибэ (дириэктэр Михайлов В.В., профком бэрэссэдээтэлэ Эверстова М.Н.) оройуон биир бастыҥ үлэлээх үлэһит кэлэктиибинэн буолар, оройуоҥҥа уонна нэһилиэнньэҕэ ыытыллар уопсастыбаннай тэрээһиннэргэ биир актыыбынай позициялаах үлэһит кэлэктиип буоларынан киэн туттабыт.

Василий Васильевич Михайлов оройуон нэһилиэнньэтин олоҕо бөҕө туруктаах буолуутун хааччыйыыга бэриниилээх үлэтин иһин СӨ коммунальнай холбоһугун Махтал суругунан бэлиэтэнэн турар.

Үүнэр-сайдар Өлөөн эбэҥки национальнай оройуон олохтоохторун олохторо-дьаһахтара бөҕө туруктаах буолуутун хааччыйыыга Никифоровтар үлэһит династияларын үтүө холобура саҥа сайдыылаах олоҕу тутар Өлөөн ыччатыгар сирдиир «Чолбон» сулус буола туруохтун.

Николай СТРУЧКОВ, «Сардаҥа» хаһыат кэрэспэдьиэнэ.
Хаартыскаҕа: Никифорофтар үлэһит династияларын бэрэстэбиитэллэрэ