САХА СИРЭ. АНААБЫР УЛУУҺА. КУЛУН ТУТАР 29 КҮНЭ —  ULUS.MEDIA. Илиитигэр талааннаах, айар куттаах Аксинья Сивцева хоту дойду тыынын биэрэр, эбэҥки, долган норуоттарын духуобунай култууратын кэпсиир хартыыналара, уран иистэрэ ураты дьикти кистэлэҥнээх курдуктар. Соторутааҕыта кини Дьокуускайга «Муус устар» фестивальга эдэр педагогтарга аналлаах хайысхаҕа ситиһиилээхтик кыттыбыта. Маны сэргэ «Мир Арктики» V регионнааҕы быыстапкаҕа ойуулуур-дьүһүннүүр искусство көрүҥэр 1 миэстэни ылан, кыайыы кынаттанна!

Кэскиллээх кыыс Анаабыр улууһун Оҕону эбии үөрэхтээһин киинин уһуйааччыта, омугунан долганка. Аксиньяны истиҥник эҕэрдэлээтибит, Дьокуускайтан бүччүм санаатын телефонунан үллэһиннэ:

— Эҕэрдэҕитигэр махтанабын. Быыстапка-дьаарбаҥкаҕа 13 хоту улуустан, Красноярскай, Ханты-Мансийскай уокуруктан о.д.а. аҕыйах ахсааннаах омуктар олорор сирдэриттэн тиийэ кэлитэлээбиттэр. Хартыыналарбын акрил кыраасканан суруйабын.

Интэриэһиргиир тиэмэбинэн Баай Барыылаах Байанай умсугутуулаах эйгэтэ, төрүттэрим дулгааннар олорбут устуоруйалара, былыргы уонна билиҥҥи олохторо-дьаһахтара. Бу былырыыҥҥы, быйылгы айымньыларым  буолаллар. Балар барыта “Анаабыр кыыллара-сүөллэрэ” диэн серияҕа киирэллэр, билигин даҕаны салгыытын оҥоро сылдьабын.

Бу күннэргэ куоракка “Сердце отдаю детям” диэн оҕону эбии үөрэхтээһин кииннэрин уһуйааччыларыгар күрэхтэр саҕаланаары тураллар. Манна эмиэ кыттаары бэлэмнэнэ сылдьабын. Бу сылдьан санаатым, Анаабырга биһиги наһаа оҕуруонан тиһэргэ, тас көстүүгэ эрэ охтубут курдукпут.

Дьиҥэр, таба тириититтэн хопоолору, ынтыкааны, кээнчэни, сарыы соннору иистэниэххэ баар этэ. Муус устар ыйга Москваҕа “Сокровище Севера” диэн улахан быыстапка-дьаарбаҥкаҕа кытта бараары бэлэмнэнэбин.

Эдэр ыччаппыт олоххо-үлэҕэ көхтөөх буолуохтарын баҕарабын. Тапталлаах Анаабырбыт үтүө аатын ааттатарга дьулуһабын.

                                                                                             Гуннара Байгильдина