САХА СИРЭ. КУЛУН ТУТАР 28 КҮНЭ —  ULUS.MEDIA. Саха эстрадатын ырыаһыта, байыаннай операция кыттыылааҕын аҕата Аркадий Николаев-Эрхаан ааспыт ыйга Запорожьеҕа бара сылдьан биир дойдулаахтарын, төрөппүт уолун көрсөн кэллэ. Кини биир дойдулаахтарбыт байыаннай дьайыы ыытылла турар сиригэр этэҥҥэ сулууспалыы сылдьалларын, кыайыыга бигэ эрэллээхтэрин туһунан биһиэхэ кэпсээтэ:

Эрхаан этэринэн, оскуола саҕаттан оҕону алын байыаннай бэлэмнэнии (НВП) үлэтэ күүскэ барыахтаах. Урут сойуус саҕана ити хамсааһын күүскэ тэнийэн, сайдан испитэ, диир.

— Билигин улуустар, оскуолалар аайы учууталлар бэйэлэрин баҕа санааларынан ити үлэни тэрийэллэр. Инникитин ити хайысхаҕа күүстээх үлэ ыытыллара буоллар.

Оттон мин улахан уолум Айтал этэринэн, “хас биирдии оҕо улаатан, төрөөбүт дойдутугар үлэлиэхтээх-хамсыахтаах, кини үлэлиирэ, дойдутун ааттатара — дойдуга бэриниилээх буолуу көрүҥэ. Дойдубутугар көмөлөһөр буоллахпытына, ол аата эн патриоккун”, — диир кини.

Аҕа дойдуну көмүскээччи күнүгэр Запорожьеҕа “Алҕаа миигин, аҕаккаа” диэн аахсыйанан баран кэллим, мин төрөппүттэр кэмитиэттэригэр баарбын. Инньэ гынан уоппуска ылан, оҕолорбутун баран эҕэрдэлээн, дойдуларыттан баһыылка тиэрдэн, кэнсиэртээн кэллибит. Таарыйа уолбун көрсөн, икки хонукка ылан сынньатан, уоппускаҕа барарын курдук хамандыырын кыттан кэпсэттим, кэннибиттэн уолум уоппускаҕа элээрэн кэллэ”, — диэн Эрхаан үөрүүтүн үллэстэр.

— Уопсайынан, мин саха уолаттарыттан киэн тутуннум, үчүгэйдик, дойдуларын күүскэ ааттата сылдьаллар. Мин үөрбүтүм, долгуйбутум диэн, анараа хайа да регионнааҕар биһиги, Саха сирэ, күүскэ көмөлөһөбүт. Мантан көмө бөҕө барар, баһыылка, ас-таҥас, эмп-том тиийэ турар. Уолаттар этэллэр: “хайаан да кыайыылаах кэлиэхпит, тыылга биһигини ахталлара-саныыллара, биһиги туспутугар бу маннык кыһаллаллара наһаа үчүгэй. Биһиги дьоһуннук, чиэстээхтик сылдьыахпыт”, — диэн улахан махталларын тиэрдибиттэрэ.

Төрөппүт буоларын быһыытынан буола турар быһыыга арыый наҕыллык, аймаммакка сыһыаннаһарга ыҥырар:

— Уолум бэйэтэ оҕо эрдэҕиттэн байыаннай буолуон баҕарар этэ. Ол баҕа санаатын эккирэтэн, бу билигин байыаннай буолбута сэттис сылыгар барда. Анараа уолаттарбыт төрөппүттэригэр, дьиэ кэргэттэригэр улаханнык аймамматыннар дииллэр. Кинилэр кытаанах санаалаах буолуохтарын наада. «Төһөнөн күүстээх санаалаах биһиги туспутугар кыһаллар буоллахтарына, биһиги эмиэ аймаммакка үчүгэйдик сылдьыа этибит”, — дииллэр байыастар. Биһиги өбүгэлэрбит, айыыларбыт көрө-истэ сылдьаллар. Мин икки өттүттэн тулууру баҕарабын. «Хайдах гыныахпытый, Ийэ дойдубут ыҥырда. Бу балаһыанньаттан хайаан да кыайыылаах тахсыахпыт, олорор дьиэбитин көмүскээбэтэхпитинэ, киммит көмүскүөҕэй”, — диэн уолаттар этэллэр.

Эрхаан курдук, хас биирдии төрөппүт оҕото кыайыы үктэллээх эргиллэн кэлэригэр баҕарар.

Хаартыска: «Военкоры Якутии» тг