САХА СИРЭ. КУЛУН ТУТАР 27 КҮНЭ —  ULUS.MEDIA.  Тулагытааҕы култуура киинигэр Мария Петровна Обутова-Эверстова төрөөбүтэ 95 сылын көрсө кини айымньыларын дорҕоонноохтук ааҕыы бастакы күрэҕэ үрдүк таһымнаахтык ааста.

Саха дьахталларыттан бастакы драматург, оҕо суруйааччыта М.П.Обутова-Эверстова айымньыларын оҕолорго, эдэр ыччакка, нэһилиэк олохтоохторугар билиһиннэрии, үөрэтии, тарҕатыы уонна үйэтитии кини аатын сүгэрбит быһыытынан, олохтоох култуура киинин кэлэктиибигэр улахан эппиэтинэһи сүктэрдэ.

Мария Петровна төрөппүт кыыһа Мария Ксенофонтовна Попова, сиэнэ Мария Степанова кэлэн ыалдьыттаабыттара күрэх таһымын өссө үрдэттэ.

Бүгүҥҥү күрэххэ айымньылары кыттааччылар эрдэттэн талан, үчүгэйдик бэлэмнэнэн, туттан-хаптан аахпыттара дьон уонна дьүүллүүр сүбэ сэҥээриитин ылла. Күрэхпит түмүгэ төрөөбүт тыл сүмэтин, эриэккэһин, кэрэтин иҥэрии, ийэ тылынан киэн туттуу, өрө тутуу, туттуллар эйгэтин кэҥэтэргэ туруулаһыы, үлэлэһии, дорҕоонноохтук, чуолкайдык, иэйиилээхтик ааҕары көҕүлээһин, сайыннарыы буолла.

Дьүүллүүр сүбэ састаабыгар СӨ култууратын туйгуна Александра Харитонова, олохтоох библиотека сэбиэдиссэйэ Александра Филиппова уонна СӨ үөрэҕириитин туйгуна, үлэ бэтэрээнэ Светлана Шарина үлэлээтилэр. Кыттааччылар тыллара-өстөрө чуолкайын, истээччи болҕомтотун тардалларын, туттар-хаптар култуураларын, тиэкис ис хоһоонун арыйыы, куолас кэрэтин, толоруу иэйиитин, истээччигэ дьайыытын сыаналаатылар.

Сэргэх тэрээһин кыттыылаахтара саастарынан бөлөххө арахсан кытыннылар. Кыайыылаахтар 1,2,3 истиэпэннээх добун уонна туоһу суруктары туттулар. «Умсугутуулаах ааҕааччы» — Матрена Михайлова, «Иэйиилээх ааҕааччы» — Ольга Павлова, «Кэскиллээх ааҕааччы» — Валерия Сатырова, 1 «а» кылаас үөрэнээччитэ, “Ааҕыыга айымньылаах сыhыан” – Раиса Кулаковская, 4 “б” кылаас үөрэнээччитэ анал ааттары туттулар.

Күрэх кыайыылааҕынан “Кылаан Чыпчаал” үрдүк ааты мөккүөрэ суох 9 саастаах Тулагы орто оскуолатын 3 “а” кылааһын үөрэнээччитэ Айсен Данилов ылла, кылаас салайааччыта Наталья Кузьмина.

Тэрээһин түмүгүнэн дорҕоонноохтук ааҕыы улахан түһүлгэтин кыайыылааҕа Айсен Данилов Мария Петровна оҕолоруттан анал суруктаах фарфоровай чороон тутан үөрдэ-көттө. Уопсайа 36 кыттааччы күөн күрэскэ кытынна.

Александра Харитонова, Тулагытааҕы культура уонна сынньалаҥ киинин үлэһитэ