САХА СИРЭ. ХАҤАЛАС УЛУУҺА. КУЛУН ТУТАР 27 КҮНЭ —  ULUS.MEDIA. Хаҥалас улууһун Маалтааны ытык сирэ 2015 сылтан Дьөһөгөй Айыы маанылаах оҕолорун — сыспай сиэллээхтэр кистээһиннэринэн туолан дьоллонон ахан турар. Холобур буолар “Дьөһөгөй” бааһынай хаһаайыстыбатын туһунан элбэхтик суруллан, кэпсэнэн турар. Манна түөрт уон төбөттөн бүтүн икки тыһыынчаҕа тиийэр ахсааннаах бөдөҥ хаһаайыстыба аныгылыы тутуулаах, техникалаах, тэрээһиннээх үлэлээн олорор. Бу, биллэн турар, улахан үлэ түмүгэ.

Кулун тутар 25 күнүгэр үгэс быһыытынан бу күн сылгыһыттар, тырахтарыыстар, оробуочайдар икки хамаандаҕа арахсан, Сылгыһыт күрэҕэр кытыннылар. Дуобаттан саҕалаан, хапсаҕайга тиийэ күрэхтэһии олус өрө көтөҕүллүүлээхтик буолан ааста. Ытык сирдэр ааттарынан арахсан ыытыллар күрэх кыайыылааҕынан “Алаас баһа” хамаандата буолла.

“Кыһыл Толооннор” бу сырыыга ытыс соттон хааллылар эрээри эһиил өссө бэлэмнээх буолуохпут диэн эрэллэрин сүтэрбэттэрин биллэрдилэр. Бастаабыт хамаандаҕа сыаналаах бириистэр, ол иһигэр бултуурга-алтыырга диэн саалар туттарылыннылар. Бэл диэтэр, тыа сиригэр олус наадалаах, саха эр киһитэ барыта баҕарар аныгы тыыга тиийэ бэлэх тутан, сылгыһыттар долгуйа үөрэн, салайааччыларга Вячеслав Нестеровка, Евгений Никифоровка, Станислав Никифоровка, Анатолий Нестеровка махталларын биллэрдилэр.

“Дьөһөгөй” хаһаайыстыбаҕа үлэлиир бэйэтэ улахан чиэс дэһэллэр манна олорон үлэлиир дьон.