Төрөппүт төлкөнү түстээччи

Туйара Кокорева 22.03.23 08:56

Саха тыла сайдыан баҕарабын,

Сайдыа диэн бэркэ эрэнэбин.

П.А. Ойуунускай.

Соторутааҕыта Солоҕон нэһилиэгэр С.И. Тарасов аатынан Өрт орто оскуолатын иитэр үлэҕэ дириэктэри солбуйааччы, наставник Светлана Алексеева “Төрөппүт төлкөнү түстээччи” диэн темаҕа төгүрүк остуолу салайан ыытта.

Олунньу 17-18 күннэригэр буолан ааспыт Бастакы Өрөспүбүлүкэтээҕи төрөппүт сугулааныгар сылдьыбыт төрөппүт, оҕунан ытыы тренерэ Марина Павлова олус киэҥник иҥэн-тоҥон туран кэпсээтэ. Марина Ильинична ити сугулаан үлэтин-ханаһын холобурдарга олоҕуран ыпсаран ылыннарыылаахтык кэпсээбитин бука бары сугулааҥҥа сылдьыбыт курдук сананан сэҥээрэн иһиттибит.

Ити кэнниттэн “Төрөөбүт тылы харыстааһын — хас биирдии киһи соруга” диэн улуустааҕы аһаҕас кэпсэтиигэ кыттан кэлбит Саха Өрөспүүбүлүкэтин үөрэҕириитин туйгуна Валенитина Шадрина киэҥник аһаҕас кэпсэтии туһунан билиһиннэрдэ.

Уһуйаан биир бастыҥ иитээччитэ, төрөппүт Майа Латышева төлөннүрэн туран оҕо иитиитигэр ордук улахан оруолу төрөппүт ылыахтаах диэн санаатын бэрт кэрэхсэбиллээхтик тиэртэ…

Төгүрүк остуол үлэтигэр саха тылын, литератууратын, култууратын 2 сийиэһигэр кыттыыны ылбыт Маргарита Александрова, Туйаара Тарасова, Александр Тарасов сийиэс үлэтин, сыалын, соругун туһунан билиһиннэрдилэр.

Ити кэнниттэн төрөппүттэр санааларын атастастылар: С.К. Алексеева (ийэ), П.Н. Тарасова (ийэ), В.Ю. Лукин (аҕа), М.И. Павлова (эбэ), Т.Р. Тарасова (эбэ) о.д.а.

Балтым, үөрэппит үөрэнээччим Саха Өрөспүүбүлүкэтигэр аан бастаан ыытыллыбыт төрөппүт сугулаанын үлэтин-хамнаһын олус киэҥник иҥэн-тоҥон кэпсээбитин, өссө хоһоон суруйбутуттан астынан хоһоон суруйдум. Ол хоһооммунан бу суруйуубун түмүктүүбүн:

Ийэ, аҕа иитиитинэн

Икки атах киһи буолар,

Эбээ, эһээ сүбэтинэн

Эрэлбит ырабыт туолар…

Төрөппүккэр дьиҥ тапталын

Төрөтөр оҕоҕор иҥэр,

Өбүгэҕэр чиҥ махталын

Өрүүтүн өспөт күүс биэрэр…

Иитиллин, иитии туһунан

Иһиттим, биллим элбэҕи,

Иитиллэр дууһам суоһунан

Илгийэр бу истиҥ иэйии…