САХА СИРЭ. УУС АЛДАН УЛУУҺА. Кулун тутар 21 күнэ — ULUS.MEDIA. 2016 сыллаахха ”Саха Өрөспүүбүлүкэтигэр сылгыны үөрдээн иитиини сайыннарар миэ­рэлэр тустарынан” диэн СӨ Бэрэсидьиэнин ыйааҕар олоҕуран, кулун тутар 21 күнүгэр – Сылгыһыт күнэ бэлиэтэнэр буолбута. Уус Алдан улууһугар 2 500 сылгы баара биллэр. Сүөһүлээх-сылгылаах дьон кыһарҕаннаах кыһыны туораан, күөх окко үктэннэхтэринэ эрэ кыстыгы хайдах ааспыттарын туһунан этэр үгэстээхтэр. Ол эрээри, быйыл ураты тымныы кыһын буолан ааста, онон сылгы иитэр дьонтон кыстык хайдах ааһан эрэрин, төһө сылгылаахтарын, туох көмөҕө баҕаралларын «Мүрү саһарҕата» ыйыталаста.

 Альберт Сивцев, Найахы нэһилиэгэ: 

– 2005 сылтан КФХ буолбутум. Онтон ыла биирдиилээн ииттэн саҕалаабытым. Сылгы ахсаан ааҕары сөбүлээбэт, кыстык хайдах ааһарыттан тутулуктаах, быһа холоон эттэххэ аттыын, биэлиин, атыырдыын 25 төбөлөөхпүт. Кыстык ааһара өссө да иннибитигэр, мантан саас айылҕа тугу көрдөрөрүн бэйэтэ билэр, онно син бэлэм курдукпун. Сылгы иитиитигэр тус бэйэбэр бааза, сир-уот наада. Уоннааҕыта син бэйэтин бириэмэтигэр кыһаллар буоллаххына, көстөн иһэр.

Ариан Жирков, Өлтөх нэһилиэгэ: 

– 52 сылгылаахпын, ол иһигэр 47 биэ, 5 атыыр баар. Сылгы кыс­тыга ааһа илик. Көрүүтэ-истиитэ дьэ, саҕаланнаҕа дии. Быйыл уһуннук тымныйан саастаах биэлэр уонна эдэр сылгылар арыый ырдылар, бу саас аны хаарбыт олус халыҥаата. Сылгы билигин барыта аһылыкка ­киирдэ. Сылгы иитиитигэр билигин ­араас көмө элбэх. Саҥа тэринээччи да буоллун, «Агростартап» да буол­лун, баазаны туттууга да көмө баар. Саха сылгытын удьуор­даан иитии күүскэ сайдыан наада, атын хааны булкуйбакка эрэ элбэтии, тэнитии наада.

Аким Гуляев, I Өспөх нэһилиэгэ:

– Мин уонтан тахса сылгылаахпын. Кыһыммыт этэҥҥэ ааһан эрэр, хаһыы баар, эбии аһатабыт. Кулуннааһын аҕы­йах. Сылгылар туруктара этэҥҥэ. Аны сааскы кэммит этэҥҥэ аастар, күөххэ үктэниэ этибит. Билигин сылгыны иитиигэ баар кыһалҕалары этэр буоллахха, мэччирэҥ сирэ суох. Бу биһиги курдук аҕыйах сылгыны тутар чааһынай дьоҥҥо туох да көмө көрүллүбэт. Нэһилиэк аайы бааза туталлара буоллар, элбэх киһи сылгыны ииттиэ этэ. Мин урут хоту улуустарынан сылдьан сылгы хаанын уларытыыга диэн хотуттан сылгылары хаста да аҕалан турардаахпын. Билигин оннук сылгылары аҕалыыга көмө баара буоллар дии саныыбын. 

Петр Готовцев, Өспөх нэһилиэгэ: 

– Сүүрбэччэ сүөһүлээхпин, 15 сылгылаахпын. Кыһыммыт олус тымныы буолла, сылгылары эбии аһатан кыстыгы  этэҥҥэ ааһан эрэбит. Хаһыы син баар этэ да, билигин хаар­быт халыҥаан мэччирэҥ уустук буолла. Бы­йыл хаһааҥ­ҥытааҕар да халыҥ хаар түстэ, күн бүгүн да түһэ турар. Кэлэр ыйга тоҥоруу-хатарыы буол­лаҕына дьэ, саамай уустук бириэ­мэбит ол буолар, ону этэҥҥэ аастарбыт. Чаа­һынай сылгы ииттэр киһиэхэ субсидия эбиллэрэ­ буол­лар, бэрт буолуо этэ. Итиэннэ, хаан уларытыыта барбатаҕа ыраатта. Атыыр соноҕос кэлэригэр туох эмэ көмө көрүллэрэ буоллар дии саныыбын. Оттуур сирбэр быйыл сайын бааза оҥостуохтаахпын. Аҕам үйэтин тухары сылгыһыт этэ. Онон кини үөрү­йэхтэрин ылынан, сылгыга оҕо эрдэхпиттэн убанан улааппытым. Бааза туттан дьарыкпын кэҥэттинэр баҕа санаалаахпын. 

Алена Стрекаловская хаартыскаҕа түһэриитэ