Олоххо өйдөбүллэрбит уостан, симэлийэн, ону сэргэ оннук майгыбытын ыһыктан, аахайбат буолан эрэр айылаахпыт. Ол түмүгэр төрүт уус өйдөбүллэрбит киһи атыҥырыыр атынынан солбулуннулар. Оҕону иитии-үөрэтии тиһигэр, философиятыгар, психологиятыгар уларыйыы киирэрэ уолдьаспыта ыраатта, диэн суруйар сэрии сылын оҕото, урукку методист Егор Васильев.

Үс, түөрт саха уратытын ыһыктыбыт үтүктээйи көлүөнэ дьон үөскээтэ. Кинилэргэ этэн-такайан, суруйан ону өйдөтөр, эгэ онуоха төннөрөр кыаллыбат, атыҥыранар, сэмэлэнэр, сэтэрэнэр суол буолбут курдук. Өбүгэ олоҕуттан тэлэһийбит, төрүт-уус, уруу-аймах диэни суолталаабат дьон патриот буолар кыахтара суох. Олоҕун төрүт-уус дойдутугар оҥосторун оннугар ордугу көрдөөн кый бырах барбыт дьонтон күттүөннээҕи эрэйбэккин. Киһи, уруу-аймах, түөлбэ уратыта эмиэ симэлийбитэ быданнаата. Ол оҕону киһи-хара оҥоруу, иитии-такайыы, төрөппүттэн, урууттан-аймахтан тэйитииттэн, араарыыттан тутуллар эбит. Оҕо туох-ханнык киһи буолан тахсара туох-ханнык эйгэҕэ, кимнээҕи эҥэрдэһэн үөскээбититтэн, улааппытыттан тутуллар. Былыргы саха оҕото ыалга, аймахтарын эҥэрдэһэн олоххо уһуйуллан, уһаарыллан ситэн-хотон, силигилээн тахсара, эргиччи сайдыылаах, чахчы ситэри-толору, сатыыра, өйдүүрэ ситэн-силигилээн өйүн тутара. Туора дьоҥҥо, тэрилтэҕэ иитиллибиттэр төһөлөөх сэнэбили, ыгыыны, мөҕүүнү-этиини, күөмчүлээһини көрсөллөрүн бары да билэн өйдөөн эрдэхпит. Онно дьиҥнээхтик бу оҕо, эдэр киһи туһугар кыһаллар-мүһэллэр киһи аҕыйах. Онтон тэптэрэн төһөлөөх оҕо, ыччат отуора хамсыырын, дьылҕата халыйарын ким да үөрэтэ, билэ сатаабат. Оннооҕор оскуолаҕа оҕо дьиҥнээх билиитигэр буолбакка бэрээдэгэр сыана туруорар учуутал суох буолбатах. Бэл аныгы төрөппүт оҕотун дуона суох ситиһиитин харса суох хайгыыр, бэлэх-туһах уунар, манньалыыр. Ол түмүгэр симиттэр, кыбыстар, тардынар, сэрэхэдьийэр диэни билбэт, онуоха өйүн да оҕустарбат дьон үксээтэ. Оҕону иитии-үөрэтии тиһигэр, философиятыгар, психологиятыгар уларыйыы киирэрэ уолдьаспыта ыраатта. Ону билгэлии сатаан кинигэ оҕото таһаарбытым 1998 сыллаахха.

Егор Васильев