САХА СИРЭ. Кулун тутар 20 күнэ — ULUS.MEDIA. Өлүөнэ эбэ хаҥас биэрэгэр, суорба таас хайа үрдүгэр дьон олохсуйан олорор түөлбэлэрэ Улахан Аан уонна Еланка. Муниципальнай тэриллии киинэ — Улахан Аан. Бу сэргэх олохтоох, чөл олоҕу, спорду тутуһар, чуолаан волейболу өрө тутар нэһилиэккэ ааспыт өрөбүллэргэ  көтөр мээчик бырааһынньыга буолан ааста.

Тыа сиригэр волейбол курдук спорт кыраһыабай көрүҥүн тарҕатааччыларыттан биирдэстэрэ, энтузиаст, спорт бэтэрээнэ Владимир Пудович Пудов сырдык кэриэһигэр быйыл номнуо тохсус сылын волейболга республикатааҕы аһаҕас турнир ыытылынна.

Спорт бырааһынньыга спортсменнар парадтаан киириилэриттэн, былаах көтөҕүүтүттэн саҕаланна. Владимир Пудович огдообото Татьяна Егоровна  мустубут дьону эҕэрдэлээн, кыайыыны-хотууну, чиэһинэй оонньууну баҕаран тыл эттэ.

Икки күн устата нэһилиэк спортивнай саалатыгар уонна оскуола спортсаалатыгар тыҥааһыннаах киирсиилэр аастылар. Сыралаах күрэхтэһии имккис күнүн түмүгүнэн, хамаанданан бастакы миэстэҕэ – Мэҥэ Хаҥалас, иккис-, үһүс- хамаандалара таҕыстылар. Оттон эр дьоҥҥо — олохтоохтор -1, Мэҥэ Хаҥалас — 2,«Аартык» — 3 миэстэ буоллулар. Дьахталлар бөлөхтөрүгэр мэҥэ хаҥаластар — 1, Уус Алдан байаҕантайдара — 2, «Сахапечать» хамаандата — 3 миэстэ хаһаайыннарынан буоллулар.

Хамаанданан бастакы миэстэни ылбыт Мэҥэ Хаҥалас хамаандата көһөрүллэ сылдьар кубогынан уонна Владимир Пудович доҕотторо олохтообут убаһаларын уонна циркулярка бирииһи тутан үөрүүлэрэ муҥура суох буолла.

Итини таһынан, кыраһыабай оонньуулары көрдөрбүт  элбэх спортсмен анал бириистэри тутта. Ону таһынан, дьахталларга «Лучший разыгрывающий” – Сардаана Старостина, “Лучший нападающий” — Валентина Шестакова, “Лучший игрок” — Оксана Куприянова, “Лучший защитник” – Александра Иванова ааттаннылар.  Эр дьоҥҥо «Лучший игрок” – Владимир Окороков, “Лучший нападающий” — Василий Атласов, “Лучший разыгрывающий» — Вячеслав Филиппов, “Лучший защитник» — Александр Аммосов анал аат хаһаайыннарынан буоллулар. Дьахталларга -9, эр дьоҥҥо — 6, хамаанда, уопсайа 104 кыттааччы кэлэн кыттыыны ылла.

Кыттааччылар күрэхтэһии тэрээһинэ сыл аайы үрдээн иһэрин бэлиэтээтилэр. Спорт бу улахан түһүлгэтин Владимир Пудов дьиэ кэргэнэ, киэҥ аймахтара, доҕотторо, олохтоох дьаһалта кэлэктиибэ, дьаһалта баһылыга А.С.Алексеев, спорду таптааччылар, олохтоох урбаанньыттар, тэрилтэлэр  өйөбүллэринэн ыытыллар. Быйыл даҕаны  улахан ааннар олус тэрээһиннээхтэрин, түмсүүлээхтэрин көрдөрдүлэр.

Ыалдьыттар түһэр, тохтуур, аһыыр сирдэрин эрдэттэн дьаһайан, кэлбит дьон олус астынан, Хаҥалас кэрэ айылҕатыттан күүс-уох ылынан тарҕастылар.

Татьяна Егоровна Пудова:

— Сыл аайы ыытыллар күрэхтэһиибит икки сыл  пандемиянан тохтоон баран, быйыл номнуо  тохсус сылбытын тэрийдибит. Мин кэргэним, үс кыргыттарбыт тапталлаах аҕалара, минньигэс сиэннэрбит эйэҕэс эһэлэрэ олоҕор чахчы спорду аргыс оҥостон олорбута.

Тыа сиригэр волейбол курдук спорт кыраһыабай көрүҥүн урут-уруккуттан  дьыл кэмиттэн, киһи сааһыттан  тутулуга суох оонньууллар. Ол курдук ханна даҕаны сайынын сайылык ыччаттара, нэһилиэк дьоно-сэргэтэ киэһэтин үлэни-хамнаһы үмүрүтэн баран, көтөр мээчиги бырахсан, күннээҕи түбүгү умнан, киэһэ хойукка диэри волейболлууллара. Кыһынын дьиҥнээх фанаттар спортсаалаттан тахсыбакка оонньууллар. Ити курдук, аҕа көлүөнэ саҕалаабыт холобурун тутуһан, билигин оскуола саастаах оҕолортон саҕалаан волейболу таптааччылар сыл аайы элбээн иһэллэрэ киһини үөрдэр эрэ.

Биһиги аҕабыт бирииһигэр тэрийэр түһүлгэбит билигин нэһилиэкпит дьонун, спорду таптааччылары түмэр биир улахан түһүлгэнэн буолла диэн киэн туттабыт. Инникитин география кэҥээн, Сахабыт сирин атын да улуустарыттан волейболу таптааччылар кэлэн күөн көрсүөхтэрэ диэн эрэнэбит.

Аҕабыт аатын үйэтитии тэрээһинигэр кыттар, сүүрэр-көтөр биир дойдулаахтарбытыгар, кэргэним табаарыстарыгар, спонсордарбытыгар, бука бары аймахтарбытыгар дьиэ кэргэним аатыттан улахан махталбын биллэрэбин. Бары чэгиэн, доруобай сылдьыҥ диэн баҕа санаабын тиэрдэбин.

Ити курдук, спорт бырааһынньыгын кыттыылаахтара баай, дириҥ историялаах Сахабыт сиригэр сандал саас кэлбитин эттэринэн-хааннарынан биллилэр. Өлүөнэ өрүс биэрэгэр турар Хаҥалас улууһун 2-с Малдьаҕар нэһилиэгэр харыйа тыа ыраас салгынынан астына  тыынан, ыһыылаах-хаһыылаах, көхтөөх сытыы киирсиилэрдээх бу икки күн умнуллубаттык ааста.

Эһиил В.П.Пудов сырдык кэриэһигэр волейболга аһаҕас турнир үбүлүөйдээх онус төгүлүн ыытыллыаҕа.

 Екатерина Бястинова