САХА СИРЭ. АНААБЫР УЛУУҺА. Кулун тутар 20 күнэ — ULUS.MEDIA. Соторутааҕыта аҕай Сааскылаах олохтоохторо «Фаворит» маҕаһыыҥҥа мип-минньигэс, сип-сибиэһэй кондитерскай астар атыыга тахсыбыттарын сэргии да, үөрэ да көрбүттэрэ. «Бу бэйэбит олохтоох оҕолорбут саҥа бэкээринэҕэ астыыллар», — диэн атыыһыт кыыс хап-сабар кэпсии охсубута. Бу туһунан «Анаабыр уоттара» хаһыат суруйар. 

Онон, быйыл Сааскылаахха тохсунньу ыйга үлэтин саҕалаабыт Н.Е.Андросов аатынан МУТ саҥа бэкээринэтин илэ харахпытынан көрөөрү, генеральнай дириэктэр Александр Михайловтыын кэпсэтэн, бара сырыттыбыт. Саҥа бэкээринэ аанын аһааппытын кытта, тута бурдук аһын минньигэс сыта киһи сүрэҕин ортотунан сайан киирдэ. Эдэркээн асчыттар Натальялаах Семен бүгүҥҥү үлэлэрин үгэнигэр түбэстибит. Эриэккэс кондитерскай астары манна астаан таһаарар кондитер үөрэхтээх Наталья Власова кылгастык бэйэтин билиһиннэрдэ:

— Бэйэм 20 саастаахпын, ааспыт сылга Ю.А.Готовцев аатынан Дьокуускайдааҕы сервис технологическэй техникумугар түөрт сыл устата повар-кондитер идэтигэр үөрэнэн бүтэрбитим. Онтон Крымҥа барбытым,  байыастарга көмөлөһөр волонтердары кытта билсэн кинилэргэ көмөлөспүтүм. Бу сылдьан манна олорор ийэбин уонна хайалаах дойдубун, хаардаах кыһыммын олус ахтаммын кэлбитим. Сааскылаахха бастакы кылааска киирэн баран куоракка үөрэнэ барбытым. Манна үлэлээбитим иккис ыйыгар барда. Кондитерскай астары Семенныын бэйэбит толкуйдаан, боруобалаан, олохтоохтор маны сөбүлүөхтэрэ диэн санаан кичэйэн оҥоробут. Сороҕор бастакы тахсааһыныгар табыллааччыта суох, оччоҕо санаабытын түһэрбэппит, салгыы идиэйэлэр киирэллэр. Тэрилтэбэр бииргэ үлэлиир дьоммун сөбүлээтим, инникитин сайыннарар, аспыт көрүҥҥэрин элбэтэр, тупсарар баҕалаахпыт.

Килиэбэ суох биир да күн олорбоккун, барыбытыгар күннэтэ наадалаах баар-суох тотоойу аспыт буоллаҕа. Бэкээринэ 10/10 иэннээх дьоҕус тутуу, нэһилиэнньэҕэ ас минньигэһин астыырга бэйэтигэр оруобуна сөп, толору хааччыллыылаах буолан душтаах, туалеттаах, ууну ыраастаан таһаарар станциялаах эбит. «Пищевые технологии» диэн тэрилтэттэн сабыс-саҥа ас астыыр икки оһоҕу атыылаһан таҥан туруорбуттар. Олохтоохторго олус наадалаах тутууну “Аркан” ХЭТ туппут, онтон ис бараанын “Услуга” ХЭТ тэрилтэ тутааччылара ылсыбыттар. Саҥа бэкээринэтин туһунан генеральнай дириэктэр Александр Михайлов маннык кэпсээтэ:

— Билиҥҥи туругунан манна биэс үлэһиттээхпин. Икки симиэнэнэн икки биэкэр, биир биэкэр көмөлөһөөччүтэ уонна кондитер буолан үлэлииллэр. Ол курдук, түүҥҥү симиэнэҕэ Александра Мигалкина, Елена Малгина үрүҥ уонна оруос (ржаной) килиэби, сибиэһэй батоннары, багеттары буһараллар. Оттон күнүскүгэ кондитерскай минньигэс аһылыктары: тортары, икки көрүҥнээх рулеттары, круассаннары, синнабоннары, коржиктары улахан оһохторугар Натальялаах Семен астыыллар. Нэһилиэнньэ саҥа аһылыктарбытыттан астыннылар, хамаҕатык атыылаһаллар, ыйытар-кэтэһэр буоллулар. Ол биһигини үөрдэр. Билигин бородууксуйабытын өссө элбэтэр соруктаахпыт.

Сааскылаахха бэйэбит «Фаворит» фирменнай маҕаһыыммытыгар эрэ буолбакка, өссө үөһээҥҥи маҕаһыыннарга атыыга таһаарыахпыт. Салайааччы быһыытынан сыаналаатахпына, саҥа бэкээринэҕэ килиэппит хаачыстыбата тубуста, эргэ бэкээринэҕэ наар тымныы буолан, килиэп тиэстэтэ үчүгэйдик тахсыбат этэ. Ону олохтоохтор тута бэлиэтии көрбүттэр. Ол курдук Александра Туприна Адамов Семенныын Дьокуускайга баран анаан үөрэнэн кэлбиттэрэ. Сааскылаах кыыһа Наташа Власова үлэлии киирбитэ повар-кондитерынан, үөрэхтээх, үлэҕэ дьулуурдаах, маладьыастар, бары үчүгэй үлэһиттэр.

Бу курдук Сааскылаах олохтоохторугар олус туһалаах саҥа бэкээринэ аһыллан, ыччакка үлэ миэстэтин таһааран, нэһилиэнньэҕэ сүрүн аспытын – хаачыстыбалаах килиэби, минньигэс амтаннаах кондитерскай астары астаан, үлэ дьонун киэргэтэн хамаҕатык маҕаһыыныгар атыылыыр.

Гуннара Байгильдина, «Анаабыр уоттара».