САХА СИРЭ. Кулун тутар 18 күнэ — ULUS.MEDIA. Үөһээ Бүлүүтээҕи лицей-интернат историята Исидор Барахов аатынан оскуолаҕа физмат кылаастар аһыллыахтарыттан саҕаланар. Ол курдук 1966 сыллаахха физико-математическай кылаастар, онтон 1974 сыллаахха 2 нүөмэрдээх оскуола тэриллиэҕиттэн саҥа икки этээстээх интернат тутуллан, араас улуустартан оҕолор кэлэн үөрэнэллэригэр төһүү күүс-көмө буолан күн бүгүҥҥүгэ диэри тиийэн кэллэ.
100 миэстэлээх толору хааччыллыылаах таас дьиэ 2019 сыллаахха үлэҕэ киирбитэ.
Манна 6 улуустан, Мииринэй, Дьокуускай куораттан араас иитиллиилээх, үөрэхтээх оҕолор кэлэн үөрэнэллэр, олороллор.
Интернат сэбиэдиссэйдэринэн үлэлээбиттэрэ 1998-2010 сылларга Николай Иванов, 2010-2019 сылларга Григорий Попов уонна 2019 балаҕан ыйыттан Галина Захарова ананан үлэлии сылдьар.
Интернат олоҕо күөстүү оргуйар. Араас тэрээһиннэр тиһигин быспакка ыытыллаллар.
Бу ыйга «Биһиги арааспыт — араас улуустан сылдьабыт» бырайыак чэрчитинэн хотугу улуустарга аналлаах нэдиэлэ буолан ааста. Бу күннээххэ 5 кыыс Эдьигээн, 1 кыыс Анаабыр улууһуттан кэлэн үөрэнэ сылдьаллар. Уруһуй конкурса, хоту дойду аһын-үөлүн быыстапката, викторина буолла. Төрөппүттэри кытта төгүрүк остуол, инники былааннар, иһирэх кэпсэтии буолан ааста.
ССРС норуодунай учуутала Михаил Андреевич Алексеев аатын сүгэр лицей-интернат инникигэ эрэллээхтик, түмсүүлээхтик үлэлии-хамсыы олорор, биир киэҥ историялаах билии кыһата республикабыт араас улуустарыттан оҕолору угуйа, ыҥыра турар.
Сиһилии видеону сэргээн көрүҥ:
Читайте нас в:
