САХА СИРЭ. Кулун тутар 16 күнэ — ULUS.MEDIA. Дьокуускайга саха литературатын төрүттээччи, фольклорист, бөлүһүөк А.Е.Кулаковскай- Өксөкүлээх Өлөксөй пааматынньыгар төрөөбүтэ 146 сылынан сибэкки дьөрбөтүн уурдулар. Дьоро тэрээһиҥҥэ суруйааччы хаан-уруу дьоно, норуот депутаттара, суруйааччылар сойуустара, Дьокуускай куораттааҕы «Таатта» түмсүү чилиэттэрэ уо.д. а. кытыннылар.
«Ил Дархан этиитинэн, Саха сиригэр 2023-2027 сс. Өксөкүлээх Өлөксөй биэс сылынан биллэриллэн турар. Бу сыллар тухары Алексей Елисеевич аата өссө күүскэ ааттаныахтаах. Онно анаммыт тэрээһиннэр республика олохтоохторугар, чуолаан эдэр көлүөнэҕэ, Өксөкүлээх эппит тылларын, санаатын-оноотун тиэрдэн, салҕаан иһиэхтээхтэр, республика сайдыытыгар тирэх буолуохтаахтар», — диэн Саха өрөспүүбүлүкэтин культураҕа уонна духуобунай сайдыыга миниистирэ, Өксөкүлээх Өлөксөй төрөөбүтэ 150 сылын бэлэмниир кэмитиэт хос бэрэссэдээтэлэ Юрий Куприянов эттэ.
Маны тэҥэ, үөрүүлээх түмсүүгэ Өксөкүлээх Өлөксөй улахан сиэнэ, Кулаковскайдар аймах бас-көс киһитэ Раиса Кулаковская бүгүҥҥү күнү улахан дьоро күнүнэн ааттыырын биллэрдэ.
«Манна мустубут бары доҕотторбор, салайааччыларга, аймах дьоммор, оҕолорбор этиэм этэ – олохпут бүгүҥҥү халлаан курдук ыраас буоллун. Мин 85 сааспын туоллум, 65 сыл ыстаастаах үлэһиппин. Бу сыллар тухары аҕабын кытта литература халыҥ хаарын кэһэн, кини эрэйин-муҥун, хомолтотун санныбар сүгэн кэллим. Этэргэ дылы, 1956-77 сыллартан эрэ бэттэх арыый намтаан, билигин эрэ дьэ күммүт таҕыста, күөрэгэйбит ыллаата. Бииргэ төрөөбүттэр, сиэттэр – бары учууталларбыт. Уопсай учууталлаабыт кэммит 260 сыл буолла. Ити бары аҥардас Реас оҕолоро. Ким да кикпэтэҕин, Өксөкүлээх сиэнэбин диэн түөстэрин тоҥсумматахтарын иһин эһэлэригэр тугу эрэ үтүөнү оҥорбут киһи диэн сылдьаллар», — диэн Раиса Кулаковская кэпсээтэ.
Раиса Кулаковская, Өксөкүлээх Өлөксөй улахан сиэнэ, Россия уонна Саха өрөспүүбүлүкэтин культуратын үтүөлээх үлэһитэ
Айар тыл аҕата, кыраайы үөрэтээччи, улуу поэт, инникини өтө көрөөччү Өксөкүлээх Өлөксөйү чиэстээһин төрөөбүт күнүн көрсө сыллата ыытыллар. Маннык тэрээһин улуу дьон аатын үйэтитиигэ биир сүрүн хайысха буолара саарбахтаммат.
Елизавета Васильева, ааптар хаартыскаҕа түһэриитэ
