Нам улууһугар Дьиэ кэргэн уонна ыччат социальнай-психологическай өйөбүлүн киинэ арылынна

Ulus.Media

САХ СИРЭ. Кулун тутар 15 күнэ — ULUS.MEDIA. Нам улууһун Ленскэй нэһилиэгэр Дьиэ кэргэн уонна ыччат социальнай-психологическай өйөбүлүн киинин дьиэтэ аһыллан, «Кылаабынай муниципальнай психолог» компетенция киинин үлэтэ саҕаламмыт үөрүүлээх тэрээһинигэр СР Правительствотын председателин солбуйааччыта Ольга Балабкина кытынна.

 

Саха омук сиэрин ситэрэн аал уоту оттон, алгысчыт Владимир Сыромятников эйгэ дьиэтин ыраастаата, алгыстаата. Тэрээһин үөрүүлээх чааһыгар Нам улууһун баһылыга Юрий Слепцов, СР ыччат министрин солбуйаччыта Надежда Мохначевская, СР Дьиэ кэргэн уонна ыччат социальнай-психологическай өйөбүлүн киинин директора Владимир Скрябин, кини солбуйааччылара Октябрина Туприна, Александр Подголов, улуус нэһилиэктэрин баһылыктара эҕэрдэ тылларын этэн, махтал суруктары, бэлэхтэри туттардылар.

“Нам улууһугар аһыллыбыт “Кылаабынай муниципальнай психолог” компетенция киинэ өрөспүүбүлүкэҕэ соҕотох буолар. Бу бырайыагы өйөөбүт Ольга Валерьевнаҕа тус бэйэм уонна улуус олохтоохторун ааттарыттан улахан махталбын биллэрэбин. Үлэһиттэргэ ситиһиилэри, инники сыаллара-соруктара туоларын баҕарабын”, — диэн Юрий Слепцов санаатын үллэһиннэ.

Салгыы Ольга Балабкина Нам улууһун баһылыга Юрий Слепцову уонна Намнааҕы киин балыыһа кылаабынай бырааһа Ариан Сергеевы кытта улууска доруобуйа харыстабылын эйгэтигэр эбийиэктэри тутууга мунньахтаатылар. Ол курдук, эргэ стационартан эмтиир куорпуска барар сылаас быһа тахсар көрүдүөр, 2 Хомустаахха врачебнай амбулатория тутууларын кэпсэттилэр.

 

«Энсиэли» хаһыат

Читайте дальше