САХА СИРЭ. Кулун тутар 14 күнэ — ULUS.MEDIA. Дьиэ-уот, коммунальнай хаһаайыстыбатын тэрилтэтэ тыа сирин сайдыытыгар улахан суолталаах. Тустаах тэрилтэҕэ үлэлэригэр олус бэриниилээх дьонноох. Биир оннук киһинэн Руслан Шестаков буолар, диэн «Үлэ күүһэ» хаһыат сырдатар. 

Кини Горнайдааҕы ДьУоКХ филиалыгар 2008 с. 16 №-дээх СПТУ электрогазосварщик идэлээх бүтэрэн баран кэлбитэ. Ити сылтан уопутуран бастыҥ үлэһит буолла. Кини үлэтин тэрилтэ салалтата үрдүктүк сыаналыыр.

Горнайга улахан объектарга эрэ буолбакка, биирдиилээн ыалга сылаас киириитигэр элбэх үлэ барда. Ол тухары, Руслан Шестаков баай уопутун, билиитин-көрүүтүн, хаачыстыбалаах үлэтин дьон-сэргэ бэлиэтиир.

Улахан дьиэ кэргэн аҕа баһылыга сүрэҕин аҥарынаан Аидалыын түөрт оҕо амарах аҕата, истиҥ ийэтэ дэтэн Бэрдьигэстээх биир бастыҥ ыала буолан олороллор. Руслан саахалы туоратар биригээдэ үлэһиттэрин кытары күнүстэри-түүннэри үлэ үөһүгэр сылдьаллар.

— Быйылгы олус тымныы кыстыгы этэҥҥэ туораатыбыт. Саахал тахсар түгэнигэр төһө кыайарбытынан түргэнник тиийэн туоратыахтаахпыт. Кыаллыбатаҕына биригээдэ барыта көмөҕө кэлэр. Онон бары мэлдьи бэлэм сылдьыахтаахпыт, — диэн Руслан кэпсиир.

Дьиэлэр сылаас буолалларыгар, нэһилиэнньэ нус-хас олороругар кыһамньыларын уурар ДьУоКХ түбүктээх үлэтэ тахсыылаах буоллун диэн баҕа санаабытын тириэрдэбит.

Вячеслав Алексеев. «Үлэ күүһэ» хаһыат