Өрөспүүбүлүкэбитигэр 2016 сылтан ыытыллар Сылгыһыт күнүн чэрчитинэн, кулун тутар 11 күнүгэр Элгээйи нэһилиэгэр Сунтаар улууһун уонна Элгээйи нэһилиэгин дьаһалталарын көҕүлээһининэн Ленин орденнаах «Элгээйи» совхоз биир киэн туттар Саха АССР үтүөлээх сылгыһыта Александр Александров төрөөбүтэ 95 сылыгар уонна Саха АССР үтүөлээх сылгыһыта Парфений Александровка аналлаах улуустааҕы «Сылгыһыт күрэһэ-2023» үрдүк таһымнаахтык ыытылынна.
Сарсыарда «Оһуор» Култуура киинигэр күрэскэ кытта кэлбит ыалдьыттары нэһилиэк баһылыга Павел Григорьев, улуус баһылыгын солбуйааччы Борис Васильев, улуус тыа хаһаайыстыбатын начаалынньыгын солбуйааччы Григорий Готовцев, Александр Афанасьевич төрөппүт кыыһа Альбина Романова, Парфений Иванович төрөппүт кыыһа Ангелина Попова эҕэрдэлээтилэр. Ону тэҥэ күрэскэ кэлбит хамаандалары билиһиннэрии, бастыҥ сылгыһыттарга наҕараадалары туттарыы үөрүүлээх чааһа буолла.
Салгыы нэһилиэк урукку аэропордун территориятыгар күрэс сүрүн чааһа буолла. Ол курдук, түөрт этааптан турар хамаанданан күрэскэ Бордоҥ, Маар Күөл, Күндэйэ, Күүкэй, Элгээйи нэһилиэктэрэ кыттыылаах 5 хамаанда күөн көрүстэ. Хас биирдии хамаанда састаабыгар түөртүү эр бэрдэ киирэр. Сүрүн күрэхтэһии өрөспүүбүлүкэтээҕи балаһыанньанан ыытылынна.
Ол курдук, хамаандалар ат сүүрдүүтүгэр, сыал ытыытыгар күрэхтэстилэр. Күрэс түмүгүнэн 8 мүн. 04 сөк.бастыҥ көрдөрүүлээх Бордоҥ нэһилиэгин хамаандата I миэстэни ылан, күрэс сүрүн спонсордара Александр Александров оҕолоро, сиэннэрэ туруорбут 60 тыһ. солк. суумалаах сүрүн бирииһи тутан үөрүү өрөгөйүн биллилэр.
II бочуоттаах миэстэҕэ 8 мүн. 41 сөк. бириэмэни көрдөрөн Күүкэй нэһилиэгин хамаандата тигистэ уонна тыа хаһаайыстыбата туруорбут 30 тыһ. солк. хаһаайынынан буоллулар.
III миэстэҕэ 8 мүн.51 сөк. кэлбит Маар Күөл сылгыһыттарын хамаандата таҕыста уонна Сунтаар нэһилиэгин «Булчут» маҕаһыын (Попов С.В.) туруорбут 20 тыһ. солк. суумалаах сэртипикээти тутан үөрдүлэр.
Салгыы биирдиилээн кыттааһыннаах күрэскэ, 1200 миэтэрэҕэ ат сүүрдүүтүгэр, 10 кыттааччыттан Маар Күөл ат сүүрдээччитэ Руслан Иванов биэтэккэ бастакынан кэлэн бочуоттаах I миэстэни ылан, Парфений Иванович оҕолоро, сиэннэрэ туруорбут 30 тыһ. солк. МР-155 саа ыларга сэртипикээтинэн наҕараадаланна.
Бу күрэскэ II миэстэни Хоро сылгыһыта Михаил Игнатьев ылан, Сунтаар нэһилиэгин «Булчут» маҕаһыыныттан Николай Ананьев аймахтара туруорбут 12 калибрдаах 250 ботуруон сэртипикээтин тутта.
III миэстэҕэ Элгээйиттэн Демьян Петров тигистэ уонна «Булчут»маҕаһыын 5 тыҺ.уонна Ананьев Н.К.аймахтара туруорбут 3 тыһ. солк. суумалаах сэртипикээти тутта.
Бэргэн ытааччы күрэһигэр 12 киһи кыттыбытыттан, Бордоҥтон сылдьар Иван Павлов бочуоттаах I миэстэни ылан, Алексей Игнатьев генеральнай дириэктэрдээх «Кэмпэндээйитээҕи туус компанията» ХЭТ туруорбут 1 туонна тууска сэртипикээт уонна СИТИМ туруорбут 5 тыһ. солк. суумалаах сэртипикээт тутта.
II миэстэни Маар Күөл бэргэн ытааччыта Руслан Иванов ылла. Кини Кэмпэндээйитээҕи туус компанията туруорбут 1 туонна тууһу ылар сэртипикээт уонна 2 тыһ. солк. ылла.
III миэстэни Элгээйиттэн Андрей Кондратьев ылан, Элгээйи нэһилиэгин Иванова Д.Е., Иванова Г.Е, Петров Д.Н. КФХ туруорбут 10 тыһ. уу харчытынан наҕараадаланна.
Тоҥ хаарынан ат сүүрдүүтүгэр муҥутуур кыайыылааҕынан Маар Күөл бастыҥ сылгыһыта Руслан Иванов Руслан
буолан, Николай Иванов туруорбут 5 куул эбиэһинэн наҕараадаланна.
Күрэс тэрээһинигэр улахан көмөнү оҥорбут тэрилтэлэргэ: ХЭТ «Айан-Суол» (сал. Крыжановскай В.В.) ат сүүрэр юыдаһааккатын бэлэмнээбитигэр, бааһынай хаһаайыстыбалар Львов В.М, Попов С.В. олохтоох бородууксуйанан кыттааччылары күндүлээбиттэринэн махталбытын тириэрдэбит.
Ити курдук Элгээйи нэһилиэгин дьаһалтата быйыл өрөспүүбүлүкэбитигэр биллэриллибит Үлэ сылынан үлэһит дьону чиэстиир, тыа сирин тутаах үлэһиттэрин — сылгыһыттары, кинилэр сыралаах, эппиэттээх үлэлэрин көрдөрөр, билиһиннэрэр, бу салааҕа ыччат дьону тардар сыаллаах бу улахан тэрээһини үрдүк таһымҥа ыытта.
Күрэһи тэрийсибит, ыыппыт, спонсордаабыт, судьуйалаабыт, ыалдьыттары аһатарга көмөлөспүт бары дьоммутугар-сэргэбитигэр дириҥ махталбытын тириэрдэбит! Салгыы үйэлэри уҥуордаан бүгүҥҥү күҥҥэ тиийэн кэлбит саха төрүт дьарыга — сылгыны иитии өссө да сайдыа, сылгыһыт үлэтэ өрө тутуллуо диэн туран кыһыҥҥы бытарҕан тымныыга, сайыҥҥы өҥүрүк куйааска аһаҕас халлаан анныгар сылдьан, сыспай сиэллээҕи тэнитэр туһугар сыралаһан сылгыһыттарга Сылгыһыт күнүнэн итиитик-истиҥник эҕэрдэлиибит! Ситиһиилээх үлэни, чэгиэн доруобуйаны баҕарабыт!
Ааптар Диана Семенова,
Анжелика Никифорова хаартыскаҕа түһэриитэ, видеоҕа устуута
Читайте нас в:
