САХА СИРЭ. Кулун тутар 1 күнэ- ULUS.MEDIA. Олунньу 28 күнүгэр «Чолбон» сурунаал редакцията Хотугулуу- Илиҥҥи федеральнай университет журналистикаҕа, саха тылыгар уонна литературатыгар, төрүт культура салааларыгар үөрэнэр ыччаты кытта көрүстэ. Көрсүһүү «Саха сирин суруйааччыта» ассоциация бэрэссэдээтэлэ, журналистика кафедратын сэбиэдиссэйэ, филология наукатын кандидата Олег Сидоров көҕүлээһининэн, университет научнай библиотекатын «Эдэр ыччаты ааҕыыга угуйуу» бырайыагын чэрчитин барда. Устудьуоннар аан бастаан библиотека үлэһиттэрэ оҥорбут «“Чолбон” сурунаал саха литературатын суолдьут сулуһа» диэн быыстапканы кытта билистилэр.

Олег Сидоров: «Ыччат саха суруйааччыларын кытта билсиэн, кэпсэтиэн, сахатын литературатын ыкса билиэн баҕа санаатын биллэрбитин түмүгэр бүгүҥҥү көрсүһүү тэрилиннэ», – диэн тылларынан саҕалаан баран, суруйааччы обществоҕа оруолун туһунан чорботон эттэ уонна устудьуоннары көрсүһүүгэ көхтөөхтүк кытталларыгар ыҥырда.

«Чолбон» сурунаал бас эрэдээктэрэ, Саха сирин Суруйааччыларын сойууһун бэрэссэдээтэлин солбуйааччы Гаврил Андросов университеттан сурунаал редколлегиятыгар Олег Гаврильевич уонна саха литературатын кафедратын доцена Людмила Павловна Григорьева баалларын билиһиннэрэн баран, сурунаал историятын, бырайыактарын кэпсээтэ, кэнэҕэһин бу көрсүһүүгэ сылдьыбыт ыччаттар «Чолбон» сурунаалы олохторугар, үлэлэригэр туһаналларыгар баҕарда. Түмүккэ хоһооннорун ааҕан иһитиннэрдэ, Россия уонна Саха сирин Суруйааччыларын сойуустара уонна бэйэтэ таһаарбыт саҥа кинигэлэрин университет библиотекатыгар бэлэхтээтэ.

Бас эрэдээктэри солбуйааччы, Россия суруйааччыларын сойууһун чилиэнэ  Данил Макеев сурунаал умсугутуулаах үлэтин, айбыт оҕолорун – кинигэлэрин билиһиннэрдэ, көрдөөх кэпсээниттэн быһа тардан аахта, Иван Бунин, Василий Шукшин, Андрей Геласимов айымньыларын хайдах тылбаастаабытын туһунан кэпсээтэ.

Уочарка, литературоведение, искусство хайысхатыгар салаа эрэдээктэрэ, Эдэр литератордар сүбэлэрин кыттыылааҕа Утум Захаров сурунаалга үлэлии кэлбит историятын уонна очеркаларын хайдах быһыылаах суруйарын, билигин тахса турар «Арассыыйа устун ат арҕаһыгар» уочаркатын геройа Дугуйдаан Винокуров туһунан итийэн-кутуйан кэпсээтэ. Сурунаал электроннай архыыбын хайдах туһаныахха сөбүн билиһиннэрдэ.

Сурунаал эппиэттиир сэкирэтээрэ Туйаара Павлова саха омук  духуобунай лидерэ, уһулуччулаах судаарыстыбаннай деятель, суруйааччы уонна учуонай П.А. Ойуунускай төрөөбүтэ 130 сылыгар аналлаах «Кэриэhим кэннибэр хааларым, кэхтибэт кэрэкэ тылларым» диэн «Чолбон-өй күрэһэ» оонньууну ыытта. Өркөн өй тургутуһуутугар саха тылын уонна журналистика салаатын устудьуоннара куоталастылар уонна кыайбыттыын-кыаттарбыттыын бары сурунаал нүөмэрдэрин бэлэх туттулар.

«ЧОЛБОН» сурунаал редакцията